Aqmola oblysynda jaıylymdyq jerlerdiń tapshylyǵy qalaı sheshiledi

KÓKShETAÝ. QazAqparat – Memleket basshysynyń tapsyrmasyna sáıkes 2022 jyldan bastap Aqmola oblysynyń aýmaǵynda paıdalanylmaǵan jáne jer zańnamasyn buza otyryp berilgen aýyl sharýashylyǵy jerlerin qaıtarý boıynsha is-sharalar júrgizilip keledi, dep habarlaıdy QazAqparat tilshisi oblystyq aýyl sharýashylyǵy basqarmasynyń baspasóz qyzmetine silteme jasap.

Vedomstvonyń málimetinshe, bıyl óńirde 400 myń gektar paıdalanylmaı jatqan aýyl sharýashylyǵy jerin memleketke qaıtarý jáne aınalymǵa engizý josparlanǵan. Qazir kezde sonyń 98,6 myń gektary qaıtarylsa, 191,1 myń gektary aýyl sharýashylyǵy aınalymyna engizildi.

«Aqmola oblysynyń 420 eldi mekenindegi 437,8 myń gektar alqapta jeke aýladaǵy maldy jaıatyn jaıylymdyq jerlerdiń tapshylyǵy baıqalady. Búgingi kúni aýyl sharýasy úshin ózekti másele bolyp otyrǵan bul máseleni quzyrly organdar birtindep sheship jatyr. Bul máseleni sheshý úshin aýdandyq atqarýshy organdar jyl basynan beri 45,8 myń gektar alańda eldi mekenderdiń shekaralaryn keńeıtý (jospar - 76,3 myń ga), 46 myń gektarda aýyldyq okrýgterge bekitý (jospar - 65,9 myń ga), 0,4 myń gektarda memleket muqtajy úshin jerdi alyp qoıý (jospar - 5,5 myń ga), 145,6 myń gektarda jaıylymdyq jerdi jaıylymdardy basqarý jónindegi josparlarǵa qosý (jospar - 217,8 myń ga) boıynsha jumystar júrgizdi», - dedi basqarmanyń baspasóz qyzmetinen.

Vedomstvodan atap ótkendeı, budan basqa, áleýmettik shıelenisti boldyrmaý maqsatynda aýyl sharýashylyǵy taýaryn óndirýshilermen 287,1 myń gektar jaıylymdyq jerdi birlesip paıdalaný týraly memorandýmdar jasaldy.

Aıta ketsek, budan buryn Aqmola oblysynda sút óndirisin 32,3 myń tonnaǵa ulǵaıtý josparlanǵanyn jazǵan edik.