Aqmola oblysynda jaıaý júrginshiniń ólimine sebepshi bolǵan júrgizýshi izdestirilýde
KÓKShETAÝ. QazAqparat - Aqmola oblysynyń Arshaly aýdanynda jaıaý júrginshiniń ólimine sebepshi bolǵan kólik júrgizýshisi izdestirilýde, dep habarlaıdy «QazAqparat» HAA tilshisi ІІB baspasóz qyzmetine silteme jasap.
Polıtseılerdiń deregi boıynsha jol-kólik oqıǵasy aǵymdaǵy jyldyń 17 qańtarynda túngi ýaqyt 22:45-ter shamasynda Arshaly aýdany Jibek joly aýlynyń mańynan ótetin «Almaty-Ekaterınbor» tas jolynyń 1206 shaqyrymynda oryn alǵan.
«Polıtseıler mert bolǵan adamnyń 59 jastaǵy Astana qalasynyń turǵyny ekenin anyqtady. Er adamdy kólik basyp ketken. Qazirgi kezde, atalǵan oqıǵaǵa baılanysty QR QK 345-babynyń 3-bólimi boıynsha qylmystyq is qozǵaldy.
Oǵan qosa, arnaıy izdeý toby qurylyp, beınebaqylaý kameralarynyń jazbalary tekserilýde jáne kýágerler anyqtalý ústinde.
Sonymen qatar, Arshaly aýdanymen qatar, oblystyń kórshi aýdandary jáne Astana qalasy aýmaǵynda atalǵan adamnyń ólimine sebepshi kólik júrgizýshisi izdestirilýde», dep kórsetilgen habarlamada.
Polıtseıler atalǵan jol-kólik oqıǵasyna qatysty qandaı da bir aqparat biletin adamdar bolsa, arnaıy «102» telefon nómirine habarlasýyn suraıdy.
