Aqmola oblysynda jaıaý júrginshini soqqan mototsıklıst komada jatyr

KÓKShETAÝ. QazAqparat - Aqmola oblysynda mototsıkl júrgizýshisi jaıaý júrginshini qaǵyp ketti. Zardap shekken eki adam aýrýhanaǵa jatqyzyldy, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, jol apaty Shortandy aýdanynyń Jolymbet aýylynda bolǵan.

Belgili bolǵandaı, «Dayun Super» mototsıkliniń 37 jastaǵy júrgizshisi kólikti basqara almaı 43 jastaǵy áıeldi qaǵyp ketken.

Saldarynan mototsıkl júrgizýshisi men jaıaý júrginshi túrli dene jaraqatymen aýrýhanaǵa jatqyzyldy. Mototsıkl júrgizýshisi komada.

«Bul derek Qylmystyq kodekstiń 345-babynyń 2-bóligi boıynsha «Kólik quraldaryn basqaratyn adamdardyń jol júrý nemese kólik quraldaryn paıdalaný erejelerin buzýy» boıynsha sotqa deıingi tergep-tekserýlerdiń biryńǵaı tiziliminde tirkelip, saraptama taǵaıyndaldy», - dedi vedomstvodan.

Aıta ketsek, budan buryn «Astana-Petropavl» tasjolynda mototsıkl júrgizýshisi jol apatynan kóz jumǵanyn jazǵan edik.