Aqmola oblysynda jataqhana tapshylyǵy qalaı sheshilýde

KÓKShETAÝ. QazAqparat - Aqmola oblysynda qoǵamdyq keńester alańdary ózekti máselelerdi sheshýdiń pármendi tetigine aınalýda, dep habarlaıdy QazAqparat tilshisi.

Búginde qoǵamdyq keńester qoǵam men bılik organdary arasyndaǵy ózindik kópir qyzmetin atqaratyn biregeı alańǵa aınaldy. Úlken transparenttilik úshin bul qurylymdar qoǵamdyq birlestikter janynda da áreket etedi, sol arqyly baǵdarlamalyq qujattardyń iske asyrylýyna júıeli baqylaýdy qamtamasyz etedi.

«Ózgerister joly: árkimge laıyqty ómir!» saılaý aldy baǵdarlamalardy oryndaýdy úılestirý maqsatynda, sondaı-aq «Nur Otan» partııasy janyndaǵy óńirlik saılaýaldy baǵdarlamalarda birqatar qoǵamdyq keńester jumys isteıdi.

Aqmola oblystyq ishki saıasat basqarmasynyń málimetinshe, «Nur Otan» partııasy Aqmola oblystyq fılıaly janyndaǵy bilim men ǵylymdy damytý jónindegi Qoǵamdyq keńes otyrysynda kolledjder men joǵary oqý oryndary oqýshylarynyń ómir súrý jaǵdaılaryn jaqsartý máselesi keńinen talqylandy. Oblys ortalyǵyndaǵy kolledjder men joǵary oqý oryndarynyń stýdentterine arnalǵan jataqhanalar qurylysynyń barysy týraly qurylys, sáýlet jáne qala qurylysy basqarmasy baıandady.

«2022 jyly 4 jataqhana paıdalanýǵa beriledi - ekeýi joǵary tehnıkalyq kolledj úshin, bireýi Aqan seri atyndaǵy joǵary mádenıet kolledji, J.Mýsın atyndaǵy joǵary pedagogıkalyq kolledj úshin», - dedi oblystyq vedomstvo basshysynyń orynbasary Raýan Ospanov.

Jyl saıyn aımaqtyq joǵary bilim berý flagmany - Sh. Ýálıhanov atyndaǵy Kókshetaý ýnıversıtetinde oqýǵa nıet bildirýshiler sany artyp keledi. Olar úshin jataqhana qurylysy birinshi másele boldy.

«Ýnıversıtette jalpy syıymdylyǵy 1365 oryndyq 5 jataqhana bar. Stýdentter úshin jeńildikpen turý sharttary týraly «Kókshetaý» qonaq úıimen memorandým jasaldy. Búginde onda 175 adam turady. 2022 jylǵa jataqhanalar men oqý korpýstaryna 120 mıllıon teńgege jóndeý jumystaryn júrgizý josparlanǵan», - dep atap ótti ýnıversıtet rektory Marat Syrlybaev.

Tehnıkalyq jáne kásiptik bilim berý júıesin jaqsartý jónindegi sońǵy tapsyrmalar aıasynda oblysta kadrlardy bilikti daıarlaýǵa ǵana emes, sondaı-aq stýdent jastardyń turýyna jaǵdaı jasaýǵa da basymdyq berilgen.

«Kúndizgi bólimde oqıtyn 18926 stýdenttiń 10277-i basqa qaladan kelgender. Kolledjder janynda 6410 oryndyq 36 jataqhana jumys isteıdi. Búginde 7 jataqhana kúrdeli jóndeýden ótti, 3 jataqhanada aǵymdaǵy jóndeý jumystary júrgizildi», - dedi Aqmola oblysy bilim basqarmasy basshysynyń orynbasary Botagóz Dúısenova.