Aqmola oblysynda «jasyryn altyn izdegen» polıtseıler ustaldy
KÓKShETAÝ. QazAqparat - Sot «Qazaqaltyn» TMK AQ kenishi shahtalarynyń birinde altyn rýdalaryn zańsyz qazyp alýǵa qoldaý bildirdi degen kúdikke ilikken polıtsııa qyzmetkerlerin eki aıǵa qamaýǵa alý týraly sheshim shyǵardy, dep habarlaıdy «QazAqparat» HAA tilshisi Aqmola oblystyq sotynyń baspasóz qyzmetine silteme jasap.
Kókshetaý qalalyq sotynyń tergeýshi sýdıasy 6 kúdiktige qatysty 2 aı - 14 naýryzdan 13 mamyrǵa deıin qamaýda ustaý bultartpaý sharasyn qoldanýǵa sanktsııa berdi.
«Qamaýǵa alýǵa osy laýazymdy tulǵalardyń aýyr qylmys jasady degen kúdikke iligýi negiz boldy. Zańda ondaı qylmys úshin 5 jyldan astam merzimge bas bostandyǵynan aıyrý jazasy belgilengen. Al kúdiktiler eger tergeý kezinde bostandyqta júrse, qylmystyq istiń obektıvti tekserilýine kedergi jasaýy múmkin», - dedi sot baspasóz qyzmetiniń ókilderi.
Eske sala keteıik, QR Memlekettik qyzmet isteri jáne sybaılas jemqorlyqqa qarsy is-qımyl agenttigi UQK-men birlese otyryp, Aqmola oblystyq ІІD-niń laýazymdy tulǵalaryn «Qazaqaltyn» TMK AQ kenishi shahtalarynyń birinde altyn rýdasyn zańsyz qazyp alýǵa qoldaý bildirdi degen kúdikpen ustaǵan bolatyn.
Vedomstvo bergen málimetterge qaraǵanda, qylmystyq toptyń quramyna Stepnogorsk ІІB bastyǵynyń orynbasary T. Dúısenbaev, Aqsý kenti polıtsııa bóliminiń bastyǵy S. Bıbatyrov, Bestóbe kenti polıtsııa bóliminiń bastyǵy D. Aınageldınov, Stepnogorsk ІІB jedel ýákilderi A. Jekibaev pen A. Kýlýshev, sondaı-aq dástúrli emes dinı aǵymdardy ustanatyndar da kirgen.
