Aqmola oblysynda jasyl beldeýdi damytý jumysy jalǵasyp jatyr
KÓKShETAÝ. QazAqparat - Aqmola oblysy Nur-Sultan qalasynyń aınalasyndaǵy jasyl beldeýdi damytyp keledi. Aımaq bul ekologııalyq sharaǵa 2009 jyldan beri belsendi atsalysýda, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, jasyl beldeý jobasy Nur-Sultan qalasynyń aınalasyn Ortalyq Azııada teńdesi joq erekshe ormandy alqapqa aınaldyrýǵa múmkindik beredi.
Biregeı jobanyń bastalǵanyna 23 jyl ótti.
Adam qolymen jasalǵan orman saıabaǵy jazyq dalanyń sortań jáne jartylaı batpaqty topyraǵynyń jańa aýmaqtaryna jaıyla otyryp, kólemin ulǵaıtyp otyr.
Tabıǵı resýrstar jáne tabıǵat paıdalanýdy retteý basqarmasynyń aqparaty boıynsha, 2025 jylǵa deıin 65 mıllıon aǵash pen buta otyrǵyzý josparlanǵan.
Japyraqty jáne qylqan japyraqty aǵashtardyń jyldyq tuqym qory bir jarym tonnany quraıdy. 2021 jyldan bastap tuqym kólemin tórt tonnaǵa deıin ulǵaıtý josparlanyp otyr.
Osy rette, Ereımentaý aýdanyn alatyn bolsaq, bıylǵy kóktemde 1000-ǵa jýyq aǵash otyrǵyzyldy.
Ereımentaý qalasynyń ortalyq alańynyń mańyndaǵy qala saıabaǵynda, aýdannyń qurmetti ardagerleri men aýdandyq máslıhatynyń depýtattary shyrsha otyrǵyzdy.
«Jaıdarly jazdyń sáni bolǵan aǵashtardyń kóbeıýi tabıǵattyń tynysyn keńeıtetini málim. Bul qorshaǵan ortaǵa degen qurmet ári tabıǵatqa degen mahabbattyń kórinisi. Keleshek urpaqqa biz aman etip qaldyratyn eń basty qundylyq ol jasyl aımaq pen tynysy keń tabıǵat. Jyl saıyn bul jumysty odan ári jalǵastyryp, aǵash otyrǵyzatyn oryndardy kóbeıtpek josparymyz bar», - dep atap ótti ardager Manap Ádireshov.
Elge eleýli eńbegin sińirip, búginde el aǵasy bolyp júgen ardaqty ardagerler men halaq qalaýlysy bolyp saılanǵan daraboz aýdan depýtattarynyń bul bastamasy óskeleń urpaqqa ónege bolmaq.
Atap aıtsaq, Aqmola oblysynyń orman qory - 1,1 mıllıon gektar, sonyń ishinde úshten bir bóligi (384,2 myń gektar) - ormandy alqap.
Jergilikti atqarýshy organdardyń quzyrynda 405,4 myń gektar (onyń ishinde 224,1 myń gektar ormandy alqap) bar.
