Aqmola oblysynda jastarǵa bólingen aqshany jymqyrǵandar sottaldy

KÓKShETAÝ. QazAqparat - Aqmola oblysynyń prokýrorlary jastardy jumysqa ornalastyrý úshin bólingen bıýdjet qarjysyn urlaýdyń qylmystyq shemasyn ashty, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap

Vedomstvonyń deregi boıynsha, oblystyq prokýratýra Jastar saıasaty basqarmasyn tekserý barysynda jastardyń jumyspen qamtýǵa jáne ornalastyrýǵa bólingen bıýdjet qarajattaryn jymqyrý faktilerin anyqtady.

«Basqarmanyń burynǵy mamany jalǵan qujattar arqyly stýdentterdi jastar uıymdaryna, olardyń basshylarymen dostyq qarym-qatynasta bolyp, formaldy túrde jumysqa ornalastyrǵan. Alaıaqtyq áreketterdiń nátıjesinde 1 mıllıon 400 myń teńgeden astam aqsha urlanǵan», - dedi vedomstvodan.

Prokýratýradan atap ótkendeı, Kókshetaý qalalyq sotynyń úkimimen burynǵy memlekettik qyzmetshi Qylmystyq kodekstiń 190-baby boıynsha sottalyp, oǵan on ese mólsherde - 14 mıllıon teńgeden astam aıyppul salyndy.

«Sol úkimimen jastar qoǵamdyq birlestikteriniń burynǵy úsh jetekshisi 2 jylǵa bas bostandyǵynan aıyryldy. Úkim zańdy kúshine endi. Bul baǵyttaǵy jumys jalǵasatyn bolady», - dep tolyqtyrdy vedomstvodan.