Aqmola oblysynda jasóspirim úsh adamdy qaǵyp ketti
KÓKShETAÝ. QazAqparat – Aqmola oblysynda úsh adamdy qaǵyp ketken jasóspirimniń ústinen qylmystyq is qozǵaldy, dep habarlaıdy Qazaqparat tilshisi oblystyq PD qyzmetine silteme jasap.
Vedomstvonyń málimetinshe, 7 qyrkúıekte Tselınograd aýdandyq PB kezekshilik bólimine 25 jastaǵy jigit habarlasyp, Qaraótkel aýylyndaǵy «Perızat» dúkeniniń tusynda jaıaý adamdardy kólik qaǵyp ketkenin aıtqan.
«Oqıǵa ornyna jetken tártip saqshylary 16 jastaǵy jergilikti turǵynnyń «Hyundai Sonata» kóligimen joldan ótip bara jatqan otbasylyq jupty qaǵyp ketkenin anyqtady. Zardap shekkenderdiń janynda kishkentaı eki balasy da bolǵan. Olar túrli dene jaraqatymen Nur-Sultan qalasyndaǵy Travmatologııa jáne ortopedııa ǵylymı-zertteý ınstıtýtyna jatqyzyldy», - deıdi vedomstvodan.
Qazirgi sátte kámelettik jasqa tolmaǵan jasóspirimniń ústinen Qylmystyq kodekstiń 345-babynyń 2-bóligi boıynsha sotqa deıingi tergeý amaldary júrgizilýde. Ol ata-anasyna kepilgerligimen úıine jiberildi.
