Aqmola oblysynda jas jigit aýyldasynyń 2 mln teńgesin urlaǵan
KÓKShETAÝ. QazAqparat - Aqmola polıtseıleri bir táýliktiń ishinde urlanǵan 2 mln teńgeni taýyp, ıesine qaıtaryp berdi, dep habarlaıdy QazAqparat tilshisi Aqmola oblystyq polıtsııa departamentiniń baspasóz qyzmetine silteme jasap.
Aqmola oblysy Bulandy aýdanynda 4 naýryzda iri urlyq jasalǵan. 60 jastaǵy jergilikti turǵynnyń shaǵymy boıynsha, belgisiz bireýler páterin ashyp, aqshalaı qarajatyn urlap ketken. Zalal somasy 2 mln teńgeden asady.
«Oqıǵa ornynda jedel tekserý toby jumys istedi. Toptyń quramynda tájirıbeli polıtsııa qyzmetkerleri, kınologtar boldy. Jedel-izdestirý is-sharalar nátıjesinde bir táýliktiń ishinde kúdikti qolǵa tústi. Ol zardap shegýshiniń 18 jastaǵy aýyldasy bolyp shyqty. Urlanǵan qarajat zańdy ıesine qaıtaryldy», - delingen vedomstvo habarlamasynda.
Urlyq faktisine baılanysty QR QK 188-baby boıynsha sotqa deıingi tergeý jumystary bastaldy. Kúdikti ýaqytsha ustaý oqshaýlaǵyshyna qamalǵan.
