Aqmola oblysynda «Jas qazaq» ániniń avtoryna músin qoıyldy
Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy aıasynda Stepnıak qalasynda ornatylǵan músinniń ashylýy saltanattyna aýdan ákimi Asqar Qıyqov, Ramazan Elebaevtyń Almaty qalasynan kelgen jıen qaryndasy Qarlyǵash Maqatova, soǵys ardagerleri men ózge de týysqandary jáne jerlesteri qatysty.
Músinniń avtory sýretshi Manarbek Burmaǵanov. Qarajat jergilikti bıýdjet esebinen alynyp otyr.
Ramazan Elebaev 1910 jyly Aqmola oblysynyń Eńbekshilder aýdany Qudyqaǵash aýylynda dúnıege kelgen. 1928-29 jyldary Orynbor qalasynda jumysshylar fakýltetinde oqyǵan.
1930 jyly Almatyda qurylǵan Qazaq atty ásker polkinde áskerı boryshyn ótedi. Osy polktiń marshyna aınalǵan «Joldastar» ánin shyǵarǵan. 1931 jyly Qazaq drama teatrynyń akteri boldy. 1933 jyly qysqa merzimdi saqshylar kýrsyn bitirip, Lepsi shekara kúzetine qyzmetke jiberiledi.
1934 jyly Almaty medıtsına ınıstýtyna oqýǵa túsedi. 1935 jyly Qazaqstannyń 15 jyldyq tól merekesine arnap «Qazaqstan», 1936 jyly Máskeýde ótken Qazaq ádebıeti men óneriniń onkúndigine arnap «Qýanyshty jolsapar» ánderin jazady. 1937 jyly joldamamen Máskeý konservatorııasyna oqýǵa túsken.
1942 jyly maıdanǵa attanady. Ol Panfılov dıvızııasynyń atqyshtar polkinde urysqa qatysa júrip, ásker qataryndaǵy ánshi-ónerpazdardan kontserttik brıgada uıymdastyrady.
Elebaev ánderi maıdandaǵy sarbazdardy erlikke jigerlendirdi. Sol jyly Elebaevtyń Borodıno túbindegi shaıqasta erlikpen qaza tapqan maıdandas dosy Tólegen Toqtarovqa arnaǵan áıgili «Jas qazaq» ánin dúnıege ákeldi.
2010 jyly Qudyqaǵash aýylynyń 80 jyldyǵyna oraı Ramazan Elebaev jerlengen baýyrlastar zıratynan bir ýys topyraq ákelinip, ákesi Erjan Elebaevtyń qabiriniń qasyna qoıyldy.
