Aqmola oblysynda «Jas daryn» respýblıkalyq baıqaýy bastaldy

Oblystyq bilim basqarmasynyń málimetinshe, baıqaýǵa Atbasar, Shortandy, Esil, Jarqaıyń, Jaqsy aýdandary jáne Kókshetaý qalasyndaǵy barlyǵy 6 balalar mýzyka mektebi qatysyp, baq synaıdy. Qatysýshylardyń arasynda 19 solıst, Kókshetaý qalasynan 1-úrmeli aspaptar orkestr, 2 skrıpkashylar ansambli jáne 1 fleıtashylar ansambli bar.

«Qazaqstan Respýblıkasy Táýelsizdiginiń 30 jyldyǵyn merekeleý jáne «Rýhanı jańǵyrý» baǵdarlamasyn júzege asyrý aıasynda Aqmola oblysy balalar mýzyka mektepteriniń jáne óner mektepterindegi mýzyka bólimderiniń bilim alýshylary arasynda uıymdastyrylyp otyrǵan baıqaýǵa barlyǵy 50 adam qatysady. Jeńimpazdar jas sanatyna qaraı anyqtalady. Baıqaýdyń maqsaty - klassıkalyq jáne zamanaýı ónerdiń úzdik úlgilerin meńgerý jáne oryndaý arqyly bilim alýshy tulǵasynyń rýhanı mádenıetin qalyptastyrý, balalar mýzyka mektepterin jáne óner mektepterin damytý, olardyń bala tulǵasyn tárbıeleý, oqytý jáne shyǵarmashylyq damytýdaǵy rólin arttyrý», - deıdi oblystyq bilim basqarmasynyń baspasóz hatshysy Indıra Qalymjanova.

Baıqaýdy Aqmola oblysy bilim basqarmasy janyndaǵy «Ónerpaz daryndy balalarmen jumys júrgizý jónindegi oblystyq oqý-ádistemelik ortalyǵy» jáne Aqkól aýdany bilim bólimi birlesip qolǵa alyp otyr.

«Jas daryn» respýblıkalyq baıqaýynyń oblystyq kezeńi kelesi jas sanattary boıynsha ótedi:

Іshekti-ysqyly aspaptar synyby boıynsha bilim alýshylar úshin:

1) kishi jas toby – 10 jasqa deıin (9 jasty qosa alǵanda);

2) orta jas toby – 10 jastan 13 jasqa deıin (12 jasty qosa alǵanda);

3) joǵary jas toby – 13 jastan 18 jasqa deıin (17 jasty qosa alǵanda).

Úrlemeli jáne urmaly aspaptar synyby boıynsha bilim alýshylar úshin:

1) kishi jas toby – 11 jasqa deıin (10 jasty qosa alǵanda);

2) orta jas toby – 11 jastan 14 jasqa deıin (13 jasty qosa alǵanda);

3) joǵary jas toby – 14 jastan 18 jasqa deıin (17 jasty qosa alǵanda).

Baıqaý qorytyndysy boıynsha jeńimpazdar men olardyń pedagogteri jáne kontsertmeısterleri de marapattalady.