Aqmola oblysynda jas analar «Azamattarǵa arnalǵan Úkimet» jobasyn sátti qoldanýda
KÓKShETAÝ. QazAqparat - Aqmola oblysynda jas analar «Azamattarǵa arnalǵan Úkimet» pılottyq jobasyn sátti qoldanýda. Bul týraly óńirlik kommýnıkatsııalar qyzmetinde «Aqmola oblysyndaǵy balabaqshalarǵa birtutas kezekti engizý týraly» taqyrybymen ótken brıfıngte aıtyldy, dep habarlaıdy QazAqparat tilshisi.
Aqmola oblysy boıynsha halyqqa qyzmet kórsetý departamentiniń memlekettik qyzmet kórsetýdi baqylaý bóliminiń bas mamany Jazıra Syzdyqovanyń aıtýynsha, «Azamattarǵa arnalǵan Úkimet» pılottyq jobasy halyq pen memlekettiń arasyndaǵy baılanysynyń jańa túri. Osy arqyly memlekettik organdar halyqqa sapaly ári jedel qyzmet túrlerin kórsete alady.
«Osyndaı memlekettik qyzmet túrlerin alý úshin turǵyndar mobıldi azamattar bazasynda tirkelýi tıis. Ony kez kelgen adam elektrondy úkimet portalynda jeke kabıneti arqyly mobıldi telefon nómirin óziniń JSN-ne (jeke sáıkestendirý nómiri) bekitýi kerek. Ony ár adam ózi nemese HQO «Connection point» ózine ózi qyzmet kórsetý sektorynda keńesshiniń kómegimen júzege asyra alady.
Qazirgi kezde, Aqmola oblysynda osyndaı qyzmet túrin 47 jas ana qoldanyp, 143 quttyqtaý «sms» habarlama joldandy. Onyń ishinde Gúljaına Sábıtova esimdi náreste birinshi bolyp «sms» habarlama arqyly týý týraly kýálik aldy», - dedi Jazıra Syzdyqova.
Sonymen qatar, brıfıngte Aqmola oblysyndaǵy balabaqshalarǵa birtutas kezekti engizý máselesi de sóz boldy. Jalpy, osy kúni oblysta 601 mektepke deıingi bilim berý mekemesi jumys isteıdi. Onyń ishinde 228-i balabaqsha, 373-i shaǵyn ortalyq. Jalpy, 1-6 jasqa deıingiler arasynda 37005 bala nemese 66,4 paıyzy (onyń ishinde 3-6 aralyǵyndaǵy 31445 bala nemese 97,7 paıyz) mektepke deıingi bilimmen qamtamasyz etilgen.
Sonymen qatar, óńirde jekemenshik balabaqshalardyń da sany artyp keledi. Qazirgi kezde, oblysta barlyǵy 96 jekemenshik balabaqsha tirkelgen. Mektepke deıingi bilimmen qamtamasyz etý maqsatynda ótken jyly paıdalanýǵa berilgen balabaqshalardyń esebinen 1896 oryn ashyldy.
