Aqmola oblysynda janaza asyna barǵan 44 adam tamaqtan ýlandy
KÓKShETAÝ. QazAqparat - Aqmola oblysy Býrabaı aýdanyndaǵy dámhanalardyń birine janaza asyna barǵan 44 adam tamaqtan ýlanyp, aýrýhanaǵa tústi, dep habarlaıdy «QazAqparat» HAA tilshisi.
Oblystyq Tutynýshylar quqyǵyn qorǵaý departamentiniń ınfektsııalyq jáne parazıttik aýrýlardy epıdemıologııalyq qadaǵalaý bóliminiń basshysy Ásem Tóleýbaevanyń málimetinshe, keleńsiz jaǵdaı aǵymdaǵy jyldyń 26 aqpanynda Býrabaı kentindegi dámhanalardyń birinde oryn alǵan.
«Janaza asyna barǵan 232 adamnyń 44-i ózderin jaısyz sezinip, dáriger kómegine júgingen. Naýqastardyń barlyǵy ish ótý, qusý, dene qyzýynyń kóterilýi belgilerine shaǵymdanǵan. Dárigerler olarǵa birden jedel medıtsınalyq kómek kórsetti. Qazirgi kezde, 10 naýqas úılerinde ambýlatorııalyq em qabyldap jatsa, qalǵany meken jaılary boıynsha aýrýhanalarǵa jatqyzyldy. Naýqastardyń jaǵdaıy qanaǵattarlyq, tıisti medıtsınalyq kómek kórsetilýde», - dep túsindirdi Á.Tóleýbaeva.
Sonymen qatar, ol qazirgi kezde, atalǵan dámhanadaǵy as máziriniń barlyǵynan zerthanalyq synama alynyp, saraptamadan ótkizilip jatqanyn atap ótti.
«Aldyn ala boljam boıynsha, aýrý jedel ishek ınfektsııasy nemese salmonellez jáne sol kúni asylǵan jylqy etinen týyndaýy múmkin. Naýqastardyń deni Býrabaı aýdany men Astana jáne Kókshetaý qalalarynan asqa kelgen adamdar. Qazirgi kezde jalpy, sol kúni asqa shaqyrylǵan adamdardyń barlyǵynyń aty-jóni anyqtalyp, tizimderi jasalynýda. Aýrýdyń naqty neden shyqqanyn zerthanada júrgizilgen saraptama qorytyndysynan keıin ǵana belgili bolady», - dedi Á.Tóleýbaeva.
