Aqmola oblysynda jańa sút fermasy iske qosylady

KÓKShETAÝ. QazAqparat - Aqmola oblysy elimizdiń iri agroónerkásiptik óńirleriniń biri bolyp tabylady. Astyq óndirýmen qatar mal sharýashylyǵy salasyn da, sonyń ishinde baǵyttardyń biri – sútti mal sharýashylyǵyn da damytýǵa kóp kóńil bólinedi. Búgingi tańda Aqkól aýdanynda qýattylyǵy 300 bas bolatyn jańa sút fermasynyń qurylysy qarqyndy júrip jatyr, dep habarlaıdy QazAqparat tilshisi oblystyń ishki saıasat basqarmasyna silteme jasap.

«Aqkól Agro» seriktestigi ishki naryqty sapaly ári tabıǵı ónimmen qamtamasyz etýdi josparlap otyr. Qazirdiń ózinde 40 bas asyl tuqymdy iri qara mal satyp alyndy.

«Sút fermasynyń qurylysy ótken jyly bastaldy. Bir mıllıard teńgeden astam somaǵa sıyr satyp alýdy josparlap otyrmyz. 2022 jyldyń qańtar-aqpan aılarynda olardan sút alynatyn bolady. Aqmola jáne Pavlodar oblystarynda sút ónimderine suranystyń joǵary ekendigi baıqalady», - dep atap ótti «Aqkól Agro» JShS dırektory Mádı Esqaraev.

«Aqkól Agro» jaqyn arada aýdannyń iri sút fermalarynyń birine aınalýdy josparlap otyr. Aldyn ala jospar boıynsha sharýashylyqtyń qýatty 500 tonnadan astam sút shyǵarýǵa jetedi.

Kásiporyn basshylyǵynyń aıtýynsha, bul aýyl sharýashylyǵy salasynda sút óndirisin damytýǵa aıtarlyqtaı septigin tıgetin bolady. Sút fermasynyń qurylysy jyl sońynda aıaqtalady. Jaqyn arada Eýropadan sımmental tuqymdy sútti sıyrlardy ákelý josparlanýda. Aǵymdaǵy jyldyń basynan beri óńdelgen sút kólemi 31,9 myń tonnany qurady, 241 tonna sary maı, 281 tonna irimshik pen súzbe, 1,6 myń tonna ashyǵan sút ónimderi óndirildi.

.