Aqmola oblysynda jańa sport nysandary ashylady
KÓKShETAÝ. QazAqparat - Aqmola oblysynda Memleket basshysynyń dene shynyqtyrý jáne buqaralyq sporttyń qoljetimdiligin arttyrý boıynsha tapsyrmasyn júzege asyrý sheńberinde dene shynyqtyrý-saýyqtyrý keshenderiniń sanyn kóbeıtý máselesi keshendi túrde sheshilýde, dep habarlaıdy QazAqparat tilshisi oblystyq ishki saıasat basqarmasyna silteme jasap.
Óńirde dene shynyqtyrý jáne buqaralyq sporttyń qoljetimdiligi basty nazarda. 2408 sport nysany jumys isteıdi. 2018 jyly qosymsha 53 sport nysany qoldanysqa berildi. Alty aýdanda zamanýı dene shynyqtyrý-saýyqtyrý keshenderi jumys isteıdi.
Aqmola oblysynyń dene shynyqtyrý jáne sport basqarmasynyń derekterine súıensek, ótken jyly respýblıkalyq jol kartasy jasalyp, oǵan 2021 jylǵa deıin kezeń-kezeńmen júzege asyrylatyn 9 dene shynyqtyrý-saýyqtyrý kesheni engizildi.
Máselen, Ereımentaý aýdanynda eki júzý basseıini, ámbebap jáne kúres zalynyń jobasy qarastyrylǵan.
«Nysandar ýaqtyly tapsyrý úshin kestege saı jumys isteý qajet. Qazirgi kezde, qurylys jumystary qarqyndy júrgizilýde. Ereımentaýdaǵy dene shynyqtyrý-saýyqtyrý kesheni jergilikti turǵyndardyń jıi baratyn ornyna aınalatyny sózsiz», - deıdi aýdandyq TÚKSh bóliminiń basshysy Erbol Máshkenov.
Sonymen qatar, Jaqsy aýylynda da jańa nysan salynýda. Bos jatqan jerde jasandy jabyndysy bar jańa fýtbol alańy salynyp jatyr. Ashyq alańy 420 sharshy metr aýmaqta túrli sporttyq jáne balǵyndarǵa oıyn jabdyqtary ornatylady.
«Bul Jastary jyly qurylǵanyna 80 jyl tolatyn aýylǵa elordadan 57,7 mıllıon teńgeniń syıy bolmaq», - deıdi aýdan ákiminiń orynbasary Lázzat Seıdahmetova.
Qala jáne aýyldarda jańa sport nysandary men oıyn alańdaryn ashýda bıznes qurylymdardyń ókilderi belsendi qatysýda. 2018 jyly «Samuryq-Qazyna» korporatıvti qorymen júrgizilgen jumystyń nátıjesinde «Meniń elim» áleýmettik ınvestıtsııa baǵdarlamasy sheńberinde oblystyń 4 aýdanynda kópbeıindi sport alańdary ashyldy. Bıylǵy jyly da bul qormen jumys odan ári jalǵastyrylatyn bolady. Qazirdiń ózinde jańa sport alańdary ashylatyn 4 aýdan anyqtalyp otyr.
