Aqmola oblysynda jańa kirpish zaýyty iske qosyldy
KÓKShETAÝ. QazAqparat - Aqmola oblysynyń Tselınograd aýdanynda jańa kirpish zaýyty iske qosyldy, dep habarlaıdy QazAqparat tilshisi ishki saıasat basqarmasyna silteme jasap.
Memleket basshysy N.Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna arnaǵan Joldaýyn júzege asyrý sheńberinde Aqmola oblysynyń ındýstrıaldy kartasynda paıda bolǵan keramıkalyq kirpish jáne iri pishindi keramıkalyq bloktar shyǵaratyn jańa zaýyt bul joly Qabanbaı batyr aýylynda ashylyp otyr.
«Avtomattandyrylǵan jáne jańa tehnologııany qoldana otyryp, báskelestikke saı ónim shyǵaratyn jańa zaýytty «Astana Ceramics» JShS-gi memlekettiń qoldaýy jáne qaryzǵa alǵan qarjynyń kómegimen salǵan. Ol úshin «Bıznestiń jol kartasy-2020» baǵdarlamasy arqyly 2,5 mıllıard teńge kóleminde nesıe bólindi. Jobanyń jalpy quny 3,8 mıllard teńgeni qurady», - dep túsindirdi ishki saıasat basqarmasyndaǵylar.
Qazirgi zamańǵy tehnologııalarmen jabdyqtalǵan kásiporynda jylyna 3 mıllıon dana ónim shyǵarýǵa bolady. Oǵan qosa, zaýytta 50 jańa jumys orny ashylyp otyr.
Zaýyttyń ashylýy rásimine Qazaqstan Respýblıkasyndaǵy Ispanııanyń Tótenshe jáne ókiletti elshisi Pedro Hose Sans Serrano, «Beralmar Techologic S.A.» jáne «Talleres Felipe Verdes S.A» (Ispanııa), sondaı-aq, «Harkovskıı mashınostroıtelnyı zavod «PLINFA» ChAO (Ýkraına) kompanııalarynyń ókilderi qatysty.
«Qurylys materıaldary «Made in KZ» saýda belgisimen shyǵarylady. Sondyqtan, oblysta ǵana emes, respýblıka aýmaǵynda da joǵary suranysqa ıe bolmaq», dep tolyqtyrdy vedomstvo.
