Aqmola oblysynda jańa aýrýhana salynady
KÓKShETAÝ. QazAqparat - Kókshetaýda Densaýlyq saqtaýdy damytýdyń 2020-2025 jyldarǵa arnalǵan baǵdarlamasy sheńberinde 630 oryndyq zamanaýı kópbeıindi aýrýhana salynady. Aýrýhana qurylysy úshin «Saryarqa» shaǵyn aýdanynan 17 gektar jer telimi bólinip otyr. Joba memlekettik-jeke menshik áriptestik arqyly júzege asyrylyp, keıin respýblıkalyq bıýdjetten qarjylandyrylady, dep habarlaıdy QazAqparat tilshisi oblystyq ishki saıasat basqarmasyna silteme jasap.
Aýrýhana qurylysy «Ronesans Holding» túrik kompanııasy jáne otandyq «Astana Group» kompanııasymen birlesip júrgiziledi.
Oblys ákimi Ermek Marjyqpaev ınvestorlarmen kezdesip, ekijaqty memorandýmǵa qol qoıdy.
Ol «Astana Group» basshylyǵyna bastamashyl jobasy úshin alǵys aıtyp, onyń oblys úshin mańyzdy ekenin atap ótti.
«Pandemııadan biraz ózgerister oryn aldy, onyń ishinde halyqtyń densaýlyǵyn saqtaý birinshi orynǵa shyqty. Biz densaýlyq saqtaý úshin kólik satyp alamyz, aýrýhanalar salamyz, olardy múmkindiginshe jabdyqtarmen jabdyqtaımyz. Biz úshin otandyq bıznestiń flagmany bolyp tabylatyn osyndaı joǵary deńgeıdegi kompanııamen yntymaqtastyq mańyzdy», - dep habarlady Ermek Marjyqpaev.
Bul joba ınfraqurylymdy jańartý jáne densaýlyq saqtaý salasyndaǵy ozyq tehnologııalardy engizý, medıtsınalyq týrızmdi damytý, medıtsınalyq personal men patsıentter úshin barlyq zamanaýı qaýipsizdik pen jaılylyq sharalaryn qamtamasyz etý esebinen halyqqa medıtsınalyq kómek sapasyn arttyrýǵa yqpal etetin bolady.
Jobany ázirleý merzimi – kelesi jyldyń maýsym aıy. Qurylystyń aıaqtalýy 2023 jylǵa josparlanǵan.
