Aqmola oblysynda jabaıy qabandy atyp alǵan brakoner ustaldy

KÓKShETAÝ. QazAqparat - Aqmola oblysynda jabaıy qabandy atyp alǵan brakoner ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, bıylǵy jylǵy qańtardyń 23-de Sandyqtaý aýdandyq polıtsııa bólimine tabıǵatty qorǵaý polıtsııasy tobynyń ınspektory habarlasyp, Petrovka aýylynyń shetinde belgisiz adam jabaıy qabandy atyp óltirgen aıtqan.

«Bul derek Qylmystyq kodekstiń 337-babynyń 1-bóligi «zańsyz ańshylyq» boıynsha sotqa deıingi tergeýdiń biryńǵaı tizilimine engizildi. Jedel-izdestirý is-sharalaryn júrgizý kezinde kúdikti retinde 30 jastaǵy turǵyn anyqtaldy», - dedi vedomstvodan.

Tekserý barysynda polıtsııa qyzmetkerleri qabannyń etin, tirkelmegen qos uńǵyly, tegis uńǵyly 16 kalıbrli IJ-27 markaly qarýyn tárkiledi.

Saraptama taǵaıyndalyp, sotqa deıingi tergeý jalǵasýda.

Aıta ketsek, Aqmola oblysynda qos aqqýdy atyp alǵan ańshy ustaldy.