Aqmola oblysynda Zerendi kýrorttyq aımaǵyn damytý baǵdarlamasy ázirlenýde
KÓKShETAÝ. QazAqparat - Aqmola oblysynda Zerendi kýrortty aımaǵyn damytý boıynsha baǵdarlama ázirlenýde, dep habarlaıdy QazAqparat tilshisi óńir ákimdiginiń baspasóz qyzmetine silteme jasap.
Aımaq basshysy Ermek Marjyqpaev jumys saparymen Zerendi aýdanynda bolyp, týrızm, bilim berý, densaýlyq saqtaý jáne óndiristik kásiporyndardyń jumysymen tanysty. Ol sondaı-aq egis jumystarynyń barysyna nazar aýdardy.
«Umaı jer» JShS-nyń egistik alqabynda aýylsharýashylyq qurylymdary men aýyldyq okrýg ákimderiniń qatysýymen ótken kezdesýde agroónerkásip salasyna qatysty máseleler talqylandy. Atap aıtqanda, saladaǵy eńbek ónimdiligin arttyrý múmkindikteri, tuqym satyp alýdy sýbsıdııalaýdyń jańa erejeleri, joǵary ónimdi tehnıkamen jáne janar-jaǵarmaımen qamtamasyz etý men ózge de suraqtar kóterildi.
Zerendi aýdanynyń ákimi Berikjan Ábýtálipov aıtyp ótkendeı, 250 myń gektardan asatyn jazǵy egistiń jalpy alańynan 12 paıyzy egildi. 66 gektardan astam jerge bıyl maıly daqyldar egiledi, bul ótken jylǵydan 5 myń gektarǵa kóp. Ósimdik sharýashylyǵy salasyn ártaraptandyrýda eńbek ónimdiligin arttyrý úshin úlken múmkindikter jatyr.
Ermek Marjyqpaev dıkandardyń nazaryn egin qyzmetkerleriniń jaqsy jalaqysyna, onyń ýaqytyly tólenip turýyna nazar aýdardy.
Zerendi aýdanynda ónerkásip óndirisin damytý úshin jaqsy áleýet bar. Osynda «Alekseevka» kaolındar ken ornynyń bazasynda «Arai Pro» JShS-nyń taý-ken baıytý kombınaty qurylysynyń jobasy iske asýda.
JShS basshysy Tımýr Ábilovtiń sózderi boıynsha, kásiporyn joǵary sapaly kaolın-shıkizatyn óndirip, satady. Bul ónim ystyqqa tózimdi kirpish, faıans, qyshqaq buıymdaryn, qurylystyq keramıka men aq kirpish jasaýda qoldanylady. Kaolın shıkizatynyń qorlary men sapasy boıynsha Alekseevka ken orny álemdegi birden-bir keni bolyp sanalady.
Oblys ákimi seriktestik basshysynan jobanyń aıaqtalý merzimderi, ónimdi ótkizý narqy, qurylatyn jumys oryndary týraly surap bildi.
«2019 jyldyń aıaǵyna josparlanǵan baıytý fabrıkasynyń paıdalanýǵa engizilýinen keıin, ónim assortımenti keńeıtiledi. Kaolın shıkizatynan basqa onda qaǵaz, farmatsevtıka, farfor, keramıka ónerkásibiniń qajettilikteri úshin joǵary sapaly kaolın kontsentraty, sondaı-aq janama ónim retinde kvarts qumy usynylady. Kaolın kontsentraty Qazaqstannyń jáne shet elderdiń kásiporyndaryna jetkiziledi. Kombınata júzden kem emes jumys oryndary qurylady, olardyń ishinde jergilikti turǵyndarǵabasymdyq beriledi» - dep túsindirdi Tımýr Ábilov.
Sonymen birge, oblys ákimi maıly daqyldardy qaıta óndirýmen aınalysatyn «Blic Terminal» JShS-nyń qyzmetimen tanysty. Maı zaýytynyń óndiristik qýattylyǵy - jylyna 12 myń tonna maı. Táýligine 60 myń tonnaǵa deıin ónim beretin dıirmen kesheni bar. Osynda broılerlik qus fabrıkasy salynýda, aǵymdaǵy jyldyń shilde aıynda ashylyp, óz qýattylyqtaryn ulǵaıta beredi.
Bir jyldary jylýmen qamtý máselesi kúrdeli bolǵan Granıtnyı kenti ótken jylý berý maýsymynan jańa blokty-modýldyq qazandyqtyń arqasynda oıdaǵydaı ótti. Osymen birge, Granıtnyı kenti turǵyndarynyń aıtýy boıynsha, sheshimin tappaǵan kommýnaldyq problemalar áli de bar. Mysaly, jergilikti kásiporynnyń balansyndaǵy káriz júıesi, aýyl ishindegi joldardyń jaǵdaıy nashar, turmystyq qoqys tómen deńgeıde shyǵarylady.
Ermek Marjyqpaev aýdan ákimi Berikjan Ábýtálipovke bul eldi mekenniń kúrdeli máselelerin tereń zerttep, sheshý joldaryn tabýdy tapsyrdy.
Zerendi aýdanynda týrızmdi damytý perspektıvalary týraly osy saladaǵy bıznes ókilderimen kóldiń jaǵasynda ornalasqan jańa «Zerendi Park» demalys úıinde talqylandy.
«Óńirimizde «Aýyl - el besigi» jobasy iske asyrylyp jatyr, onyń aıasynda týrıstik klasterdiń damýyna erekshe nazar aýdarylady. Oǵan úsh aýdan ortalyǵy engizildi - Arshaly, Zerendi jáne Astrahan. 2,8 mlrd teńge bólindi, bul somanyń jartysyna jaqyny Zerendi aýdanyna kózdelip otyr. Eń bastysy, biz ınfraqurylymdy jaqsartamyz, joldardy jóndeımiz, olardyń 25 kılometri tek Zerendiniń ishinde ǵana. Jańa trotýarlar, jaryqtandyrý, rekreatsııalyq aımaqtar jáne basqa da obektiler salynady. Tabıǵatymyz jaqsy, buny durys paıdalana bilýimiz kerek», - dep atap ótti Ermek Marjyqpaev.
Óńir basshysy oblysta Şýchınsk-Býrabaı kýrorttyq aımaǵyna uqsas Zerendi kýrorttyq aımaǵyn damytý boıynsha jeke baǵdarlama daıyndalyp jatqanyn aıtty. Sonymen birge, jýyrda Zerendi aýdanynda týrızm boıynsha keńes quryldy. Bıznesmenderdiń tikeleı qatysýymen týrızmdi damytýdyń jol kartasy ázirlenip, oǵan 16 mlrd teńge somasyna 40 is-shara engizildi.
Zerendi aýylynda Ermek Marjyqpaev 21 páterli turǵyn úıdiń qurylys alańynda, aýdandyq emhanada, «Aurora Garden», «Aq Danat» týrıstik obektilerinde boldy.
Jumys saparynyń qorytyndysy boıynsha oblys basshysy aýdan ákimdigine áleýmettik, óndiristik jáne týrıstik salalardy damytý boıynsha birqatar naqty tapsyrmalar júktedi.
