Aqmola oblysynda zamanaýı sport kesheni ashyldy
KÓKShETAÝ. QazAqparat – QR Táýelsizdiginiń 30 jyldyǵyna tartý retinde Stepnıak qalasynda zamanaýı dene shynyqtyrý-saýyqtyrý kesheni paıdalanýǵa berildi, dep habarlaıdy QazAqparat tilshisi oblystyq ishki saıasat basqarmasyna silteme jasap.
Birjan sal aýdanyna jumys saparymen barǵan aımaq basshysy Ermek Marjyqpaev jańa nysannyń ashylýyna qatysty. Jalpy, aýdany 1,6 ga bolatyn sport nysanynda jattyǵý, kúres zaldary bar, voleıbol, basketbol jáne fýtbol úıirmeleri jumys isteıdi. Nysan qajetti jıhaz jáne sporttyq quraldarmen jabdyqtalǵan.
«Oblysta sport ınfraqurylymdarynyń aıasyn keńeıtýge úlken kóńil bólinýde. Qazirgi zamanǵy sport alańdary, stadıondar salynýda, dene shynyqtyrý-saýyqtyrý keshenderi men júzý basseınderi paıdalanýǵa berilýde. 2020 jyldyń basynan beri sport ǵımarattarynyń sany 39 – ǵa artty. Óziniń jaqsy sporttyq dástúrlerimen áıgili uly Birjan saldyń otanynda oblystyń jetekshi sportshylary tárbıelendi. Odardyń qatarynda Prezıdenttik kópsaıystan sport sheberi, Qazaqstannyń toǵyz dúrkin chempıony Igor Ýsanın, respýblıkalyq jarystardyń júldegeri Olga Darınskaıa. Aýdanda buqaralyq sport ta tıisti deńgeıde damýda. Aýdanda halyqtyń 30,7 paıyzy júıeli túrde dene shynyqtyrýmen jáne sportpen aınalysady», - dep atap ótti aımaq basshysy.
Aıtalyq, sońǵy 10 jylda 6 aýdanda dene shynyqtyrý-saýyqtyrý keshenderi paıdalanýǵa berildi, oblystyń 3 aýdanynda dene shynyqtyrý-saýyqtyrý kesheniniń qurylysy júrgizilýde.
Eske sala keteıik, 2020 jyly Birjan sal aýdanyndaǵy Ańǵal batyr aýylynda 21 páterli turǵyn úıdiń qurylysy jáne sý qubyry jelisin qaıta jańartý jumystary aıaqtaldy. Kazgorodok orta mektebine kúrdeli jóndeý jumystary júrgizildi. Stepnıak qalasyndaǵy stadıon jańartyldy. Bıyl ekinshi 21 páterli turǵyn úıdiń qurylysy bastaldy. Oblystyq bıýdjetten aýdannyń 9 eldi mekenin sýmen jabdyqtaýdy jaqsartý jáne aýdan ortalyǵynyń kóshelerin jóndeý sııaqty jumystarǵa (8 shaqyrym) 1,3 mıllıard teńge qarjy bólindi.
