Aqmola oblysynda vırýs juqtyrǵandardyń 11 paıyzy 20-30 jas aralyǵyndaǵylar
KÓKShETAÝ. QazAqparat - Koronavırýsqa jaı tumaý tárizdi qaramaý kerek. Bul aýrý sanaýly kúnderde buryn eshqandaı aýrýy bolmaǵan eń myqty jastardyń densaýlyǵyn buzýy múmkin.
Bul týraly aımaq basshysy Ermek Marjyqpaev óńirde karantın sharalaryn sharalardy saqtaý týraly ótken brıfıngide aıtty, dep habarlaıdy QazAqparat tilshisi.
Aımaq basshysynyń aıtýynsha, óńirde koronavırýs ınfektsııasyn juqtyrǵan naýqastardyń 11 paıyzy 20-30 jas aralyǵyndaǵy jastar, 25 paıyzy 30-50 jas aralyǵyndaǵylar.
«Koronavırýsqa jaı tumaý tárizdi qaramaý kerek. Bul aýrý sanaýly kúnderde buryn eshqandaı aýrýy bolmaǵan eń myqty jastardyń densaýlyǵyn buzýy múmkin. Sanıtarlyq sharalardy saqtamasaq qatań karantın rejımine qaıta kóshýimiz múmkin. Sondyqtan árbir oblys turǵyny oǵan tolyq jaýapkershilikpen jáne túsinistikpen qaraýy tıis!», - dedi Ermek Marjyqpaev óz sózinde.
Brıfıngide aıtylǵandaı, tótene jaǵdaı engizý kezinen bastap oblys aýmaǵynda 100 blokpost jumys istese, búgingi kúni onyń 6-ýy ǵana qaldy. Qaýipsizdik sharalarynyń saqtalýyn baqylaý maqsatynda jedel toptar reıdter júrgizip jatyr.
Búgingi tańda 4 myń nysan tekserilip, olardyń 375-nen ereje buzý jaǵdaılary anyqtaldy. Nátıjesinde 200 ákimshilik materıal toltyryldy. Sondaı-aq, sanıtarlyq epıdemıologııalyq talaptardy saqtamaǵan jeke tulǵalarǵa qatysty 400-den astam materıal toltyryldy. Oblysta qosymsha 2 PTsR zerthanasy (Ulttyq saraptama ortalyǵynyń fılıaly men «Olımp» medıtsınalyq ortalyǵynyń zerthanasy bazasynda) ashylyp, jedel testileý júrgizip jatyr. Bir aıda 30 myńǵa jýyq adam test tapsyrdy. Sanıtarlyq normalardy buzǵany úshin birqatar nysan, onyń ishinde qurylys kompanııalary, dámhanalar, meıramhanalar jabylǵan. Sondaı-aq, qoǵamdyq kólikti paıdalaný erejeleri kúsheıtilgen.
