Aqmola oblysynda uzyndyǵy 220 metrlik káýap daıyndalady
KÓKShETAÝ. QazAqparat - 2018 jyldyń 28 qyrkúıeginde Aqmola oblysynda elimizdegi eń iri Makınsk qus fabrıkasy iske qosylady. Sol kúni kásiporynnyń 200-den astam qyzmetkeri taýyq etinen uzyndyǵy 220 metr káýap daıyndap, jańa álemdik rekord ornatpaq. Rekord resmı túrde Gınnestiń rekordtar kitabynda tirkeledi, dep habarlaıdy QazAqparat tilshisi.
Kásiporynnyń BAQ pen baılanys jáne PR menedjeri Malıka Bóldekbaevanyń aıtýynsha, káýap daıyndaý úshin 400 kılogramnan astam taýyq eti paıdalanylady. Shamamen 3 myńnan astam adam onyń dámin tatady dep boljam jasalynyp otyr.
«Aıta ketý kerek, rekordtar kitabyna engen aldyńǵy rekord 2007 jyly Sıngapýrda ornatylǵan edi, sol kezdegi káýaptyń uzyndyǵy 140 metrdi qurady. Biz barlyq qazaqstandyqtardy bizdiń merekege atsalysýǵa shaqyramyz» - deıdi «Aitas KZ» AQ quryltaıshysy jáne bas dırektory Serik Tolyqpaev.
Rekordty ornatý qýattylyǵy jylyna 50 000 myń tonna qus etin daıyndaıtyn - «Makınsk qus fabrıkasy» JShS - Orta Azııa jáne Qazaqstanda eń iri qus fabrıkasynyń ashylýyna oraılastyrylǵan. Bul qýattylyǵy, tehnıkalyq jabdyqtalýy jáne ınvestorlardyń quramy jaǵynan biregeı joba bolyp tabylady. Investorlar qatarynda - «Aitas KZ» AQ, Eýropa qaıta qurý jáne damý banki, Baiterek Venture Fund venchýrlyq qory, kredıtory «Qazaqstan damý banki» AQ bolyp tabylady.
Joba aıasynda ınkýbatsııa, qus ósirý, soıý jáne músheleý, tońazytý jáne qaptaý, soıý qaldyqtaryn qaıta óńdeý salasynda eń úzdik zamanaýı tehnologııalardy paıdalaný, álemdik óndirýshilerdiń tehnologııalyq jabdyqtarynyń qoldanylýymen jemshóp óndirý kózdelgen.
Makınsk qus fabrıkasy Qazaqstan turǵyndaryn daıyn ónimge, ekologııaǵa qoıylatyn Eýropalyq sapa talaptarynyń eskerilýimen, tiri qusqa adamgershilikpen qaraýǵa úndep, Halal standartynyń normatıvterin saqtaı otyryp, óndirilgen sapaly ónimmen qamtamasyz etedi.
«Aitas KZ» AQ - bul vertıkaldy-ıntegratsııalanǵan holdıng, óz quramynda ósimdik sharýashylyǵy, qus sharýashylyǵy jáne et óńdeý salasyndaǵy kásiporyndardy biriktiredi. Holdıng quramyna 11 kompanııa kiredi, onyń ishinde jylyna 25 000 myń tonna et óndirý qýattylyǵymen broıler etin óndirý jáne qaıta óńdeý boıynsha tabysty zamanaýı kásiporyn - Óskemen qus fabrıkasy jáne Makınsk qus fabrıkasy bar. Onyń qýaty 2020 jyly jylyna 50 myń tonna et óndirýge deıin jetedi (2020 jylǵa deıin qýattylyǵy jylyna 25 000 myń tonna et).
