Aqmola oblysynda úzdik jyrshy-termeshiler anyqtaldy
KÓKShETAÝ. QazAqparat - Kókshetaýda «Tekti sózdiń tóresi - terme» atty jyrshy-termeshilerdiń oblystyq baıqaýy ótip, úzdikteri marapattaldy, dep habarlaıdy QazAqparat tilshisi.
«Rýhanı jańǵyrý» baǵdarlamasy men Tilder merekesi aıasynda uıymdastyrylǵan baıqaýǵa Aqmola oblysynyń ár óńirinen jınalǵan 16-35 jas aralyǵyndaǵy 13 jyrshy-termeshi qatysyp, baq synady. Qatysýshylar bıylǵy Jastar jylyna jáne Súgir jyraý Begendikulynyń 125 jyldyq mereıtoıyna oraı taqyryptyq baǵyttardaǵy shyǵarmalardy oryndady.
Jınalǵandar aldynda quttyqtaý sóz sóılegen Aqmola oblysy ákiminiń orynbasary Aına Mysyrálimova ulttyq tárbıe men halyqtyq ónerdi nasıhattaýǵa baǵyttalǵan baıqaýdyń mańyzdylyǵyna toqtaldy.
«Jyr-terme janrynyń qazaq ónerindegi orny erekshe. Elbasy Nursultan Nazarbaev «Uly dalanyń jeti qyry» maqalasynda Uly dalanyń halyq aýyz ádebıeti týyndylaryn keńinen nasıhattaý, jyrshylar men termeshilerdiń baı muralaryn elge tanytý, damytý kerektigin tilge tıek etti. Qany qazaq, jany qazaq adamnyń terme tyńdamaýy múmkin emes, sondyqtan Qazaqstandyqtardyń tildik mádenıetin jetildirýge baǵyttalǵan osyndaı sharalar arqyly taǵylymǵa toly tárbıe beretin terme janryn óńirimizde damytyp, jas termeshilerdi nasıhattaımyz. Terme-tolǵaý – qazynaly qazaq tarıhynan syr shertip, zamana bolmysyn aıqyndap, tárbıe beredi. Kezinde Maılyqoja, Shal aqyn, Imanjúsip termeleriniń el jadynda jańǵyryp, búgingi kúnge deıin saqtalýynyń syry da osynda. Qazirgi kezde termeshilik ónerdiń keń qulash jaıýyna teledıdar men radıo arqyly beriletin habarlardyń jáne kóptegen baıqaýlardyń ótkizilýi zor múmkindik týǵyzyp otyr. Óńirimizde jyr jáne terme ónerinde tanylyp júrgen dástúrli ánshilerimiz de óz kórermenderin qýantýda», - dedi Aına Mysyrálimova.
Bısara Mákenova, Qaırat Beshimov, Názıra Beısenova syndy óńirge belgili azamattardan qurylǵan qazylar alqasy termeshilerdi ánshilik sheberligine, tańdaǵan týyndysynyń mazmundylyǵyna, sahna mádenıetin ustaýyna qarap baǵa berdi.
Sahna tórine birinshi bolyp shyqqan Tselınograd aýdanynyń úkilep qosqan úmiti Elbol Qýanbek «Baılaýy bekem bes ǵasyr» termesin oryndap kórermenderdi bir jelpintip tastasa, Bolatbek Orazbaevtyń «Táýelsizdik tolǵaýyn» oryndaǵan arshalylyq Nuráli Eshattyń ónerine jurt qoshemet kórsetti.
Degenmen, kileń myqtylar jınalǵan saıysta baǵy men baby qatar shapqan Aqkól aýdanynyń úkilegen úmiti Azamat Qaıyrov úshinshi oryn, Tselınograd aýdanynyń ókili Dáýren Ysqaq ekinshi oryn, al, kókshetaýlyq Álbolsyn Tańnur birinshi orynǵa laıyq dep tanyldy. Jeńimpazdar aqshalaı syılyqtarmen marapattaldy.
