Aqmola oblysynda Úzdik jas tarıhshylar anyqtaldy

KÓKShETAÝ. QazAqparat - Aqmola oblysynda 9-10 synyp oqýshylary arasynda pedagog, aǵartýshy Ybyraı Altynsarınniń 180 jyldyǵyna jáne el Táýelsizdiginiń 30 jyldyǵyna arnalǵan «Meniń kishi Otanym» atty jas tarıhshylardyń respýblıkalyq zııatkerlik onlaın baıqaýynyń jeńimpazdary anyqtaldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Shara Týǵan eldiń tarıhyna qyzyǵýshylyq tanytatyn daryndy oqýshylardy anyqtaý, qoǵamdyq belsendilikti qalyptastyrý jáne óskeleń urpaqtyń patrıottyq jáne azamattyq sezimin damytý, sondaı-aq oqýshylardyń ólketaný jáne Qazaqstan tarıhy boıynsha bilimin damytý maqsatynda ótkizildi.

Bilim basqarmasynyń baspasóz qyzmetinen atap ótkendeı, baıqaýǵa mektep, aýdandyq, qalalyq kezeńderde irikteýden ótken 13 aýdannan, Stepnogor, Kókshetaý qalalarynan, sondaı-aq, daryndy balalarǵa arnalǵan 4 oblystyq mamandandyrylǵan mektep-ınternattan 61 oqýshy qatysty.

Baıqaý jeńimpazdary eki týr jáne «Meniń kishi Otanymnyń tarıhy», «Kishi Otanymnyń sımvoly», «Meniń kishi Otanymnyń bolashaǵy» jáne «Meniń týǵan ólkem» atty tórt atalym boıynsha anyqtaldy.

Qatysýshylardy baǵalaý kezinde qazylar alqasy taqyryptyń tolyq ashylýyna, ıdeıanyń biregeıligine, kórkemdik sheberligine, tehnıkalyq jáne sapaly oryndalýyna nazar aýdardy.

«Men úshin bul aýdannyń tarıhı eskertkishterin zertteýdegi úlken tájirıbe. Men kóptegen qyzyqty nárselerdi bildim. Osy baıqaýǵa qatysqanyma qýanyshtymyn. Uıymdastyrýshylarǵa múmkindik bergeni úshin alǵys aıtamyn. Respýblıkalyq baıqaýda oblys namysyn laıyqty qorǵaýǵa daıynmyn», - dep oıyn bildirdi Atbasar qalasynyń №2 jalpy bilim beretin mektebiniń 9 synyp oqýshysy, «Kishi Otanymyzdyń sımvoly» atalymynyń jeńimpazy Nurjan Muratov.

Oblystyq kezeńniń jeńimpazdary dıplomdarmen marapattaldy, aldaǵy qarasha aıynda ótetin respýblıkalyq baıqaýǵa qatysady.