Aqmola oblysynda úzdik ustazdar marapattaldy
KÓKShETAÝ. QazAqparat – Aqmola oblysynyń ákimi Ermek Marjyqpaev qazan aıynyń birinshi jeksenbisi - Ustazdar kúni qarsańynda óńirdiń úzdik pedagogtaryn marapattady, dep habarlaıdy QazAqparat tilshisi.
Oblystyq Іshki saıasat basqarmasynan málim etkendeı, óziniń quttyqtaý sózinde aımaq basshysy elimizdiń bilimdi urpaǵyn tárbıeleýde muǵalimderdiń eńbegine erekshe toqtaldy.
«Búgingi shaǵyn ǵana ótip jatqan sharamyzda oblysymyzdaǵy barsha pedagogter qaýymyn tól merekemen quttyqtap, qajyrly eńbekteri úshin alǵys bildiremin. Bul merekeniń jóni basqa, joly bólek. Bul ómirdegi adal da eń izgi nıetti jan – ustaz. Árbir adam úshin muǵalimniń orny erekshe», - dep atap ótti aımaq basshysy.
Sharada aıtylǵandaı, sońǵy úsh jylda óńirde bilim salasyna jumsalatyn qarjy 50 mıllıard teńgege ósti. Ústimizdegi jyly oblystyń bilim júıesin damytýǵa 127 mıllıard teńge qarajat bólindi. Úsh aýysymmen oqytatyn jáne apatty jaǵdaıdaǵy mektepterdiń máselesi birtindep sheshilip keledi.
Sharada eseli eńbegimen kózge túsken bir top muǵalim «Ybyraı Altynsarın» jáne «Qazaqstan Respýblıkasynyń bilim berý isiniń qurmetti qyzmetkeri» tósbelgileri, sondaı-aq, oblys ákiminiń Alǵys hattarymen marapattaldy. Joǵary marapatqa ıe bolǵan 31 muǵalim aqshalaı sertıfıkatqa ıe boldy.
Budan bólek, «Úzdik pedagog-2020» respýblıkalyq baıqaýy jeńimpazdarynyń da esimderi maqtanyshpen aıtyldy. Olardyń qatarynda Atbasar qalasyndaǵy «Altyn besik» balabaqshasynyń mýzykalyq jetekshisi Záýresh Batyrova, Makınsk aqalasyndaǵy mektep ınternatynyń bastaýysh synyp muǵalimi Lıýtsııa Podolko, Jaqsy aýdanynyń Qıma aýylyndaǵy G.Ábdrahmanov atyndaǵy orta mekteptiń matematıka pániniń muǵalimi Erkegúl Súleımen, Sh.Ýálıhanov KMÝ kópbeıindi kolledjiniń orys tili jáne ádebıeti pániniń muǵalimi Saltanat Qusaıynova bar.
