Aqmola oblysynda úzdik sportshylar marapattaldy
KÓKShETAÝ. QazAqparat - El Táýelsizdiginiń 30 jyldyǵy men Sport kúnin merekeleý aıasynda Esil aýdanynda túrli jarystarda aýdan, oblys, respýblıka namysyn qorǵaıtyn jattyqtyrýshylar quramy men sportshylardyń qatysýymen «Deni saý urpaq – ult qundylyǵy» atty dóńgelek ústel ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.
Sharaǵa aýdan ákiminiń orynbasary Nurlan Samatov qatysyp, sportshylardy kásibı merekelerimen quttyqtady.
«Aýdanda buqaralyq sportty damytýǵa erekshe kóńil bólingen. Dene shynyqtyrýmen jáne sportpen aınalysý úshin barlyq qajetti jaǵdaılar jasalady, bul halyqtyń densaýlyǵyn nyǵaıtýǵa jáne salaýatty ómir saltyn nasıhattaýǵa yqpal etedi. Bizdiń sportshylar úlken sport arenalarynda aýdanymyzdyń abyroıyn asqaqtatýda. Biz sportshylarymyzdyń jetistikterin maqtan tutamyz, sport sheberleriniń qolynan estafetany qabyldap júrgen jastardyń jetistikterine qýanamyz. Sizderge jańa sporttyq jetistikter men jeńister tileımin», - dedi Nurlan Samatov quttyqtaý sózinde.
Kezdesý barysynda jınalǵandar aýdannyń sport salasynyń aǵymdaǵy jaǵdaıyn talqylady, sondaı-aq dene shynyqtyrý men sportty odan ári damytý máseleleri boıynsha pikir almasty. Shara sońynda aýdan ákiminiń orynbasary jattyqtyrýshylar men sportshylarǵa alǵys hattar tabys etti.
Marapattalǵandardyń arasynda Esil balalar-jasóspirimder sport mektebiniń túlegi Bekzat Baımuratov bar. Jas jigittiń ártúrli sport túrleri boıynsha kóptegen jetistikteri bar. Bekzat jaýyngerlik sambodan jáne grepplıngten QR sport sheberi, qoıan-qoltyq kúresten jáne erkin kúresten sport sheberine úmitker. Grepplıng boıynsha Qazaqstan chempıony jáne «Asia open» halyqaralyq týrnıriniń kúmis júldegeri, qoıan-qoltyq urys boıynsha respýblıkalyq týrnırlerdiń chempıony, jaýyngerlik sambodan Qazaqstan chempıonatynyń júldegeri, sonymen birge, osy jylǵy grepplıngten Qazaqstan chempıony ataǵyna ıe boldy.
Aýdandyq balalar men jasóspirimder sport mektebiniń tárbıelenýshisi bolǵan taǵy bir talantty sportshy Іlııas Saıfýlın. Ol jaqynda Bolgarııada ótken MMA boıynsha jasóspirimder arasyndaǵy álem chempıonatynda qola medal jeńip aldy. Aqmola oblysynyń aýdandary men qalalarynda balalar men jasóspirimderdi dene shynyqtyrýmen aınalysýǵa tartýǵa úlken kóńil bólinip keledi. Búgingi tańda 29 sport mektebinde 15 myńnan astam jas atlet jattyǵady.
