Aqmola oblysynda Úzdik sándik-qoldanbaly óner sheberleri anyqtaldy
KÓKShETAÝ. QazAqparat - Kókshetaýda el Táýelsizdiginiń 30 jyldyǵyna arnalǵan «Meniń Otanym-meniń Qazaqstanym» sándik - qoldanbaly óner sheberleri men qolónershileriniń oblystyq baıqaýy ótti, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.
Oblys ortalyǵyndaǵy Dostyq úıiniń janynda ornalasqan Arbat aýmaǵynda uıymdastyrylǵan shyǵarmashylyq sharada oblys aýdandary men qalalarynda ótken kezeńderdiń qorytyndysy boıynsha iriktelgen sheberlerdiń jumystary usynyldy.
«Qoǵamdyq kelisim» mekemesiniń baspasóz qyzmeti atap ótkendeı, baıqaý qazaqstandyq patrıotızmdi tárbıeleý, sheberlerdiń shyǵarmashylyq áleýetin iske asyrý, Qazaq ulttyq ónerin damytý jáne eńbek qundylyqtaryn belsendi ilgeriletý maqsatynda Qazaqstan halqy assambleıasynyń «Qazaqtaný» ǵylymı-aǵartýshylyq jobasy aıasynda ótkizildi. Kókshetaý, Stepnogor, Qosshy qalalary men oblystyń 11 aýdanynan 25 sheberler men qolónershiler ózderiniń biregeı jáne ásem buıymdaryn usyndy. Onyń ishinde aǵashtan, bylǵarydan, súıekten, bıserden, kıizden, júnnen, plastıkten, metaldan jasalǵan buıymdar, ulttyq naqyshtaǵy buıymdar, keste tigý, kıiz basý, toqý, túrli qolóner, kádesyılar tárizdi túrli jumystar bar.
Baıqaý qatysýshylaryna oblys ákiminiń orynbasary Aına Mysrálimova quttyqtaý sóz sóıledi.
«Meniń Otanym – Meniń Qazaqstanym» jobasy sizderdiń qanshalyqty talantty ekenin kórsetti, dostyq pen senimdi, etnostar arasyndaǵy jan-jaqty shyǵarmashylyq, mádenı baılanystardy nyǵaıtty, sándik-qoldanbaly óner sheberleri men qolónershileriniń kásibı ósýi men qarym-qatynasy úshin shyǵarmashylyq atmosfera qurdy. Men barlyq qatysýshylarǵa Qazaqstan halqynyń ulttyq dástúrleri men mádenı qundylyqtaryn nasıhattaǵany, halyqtyq qoldanbaly ónerdi damytqany úshin alǵys aıtamyn», - dep atap ótti aımaq basshysynyń orynbasary.
Halyq sheberleriniń úzdik jumystaryn Qazaqstan halqy Aqmola assambleıasynyń etnomádenı birlestikteri men qoǵamdyq qurylymdarynyń tóraǵalary kirgen quzyretti qazylar alqasy anyqtady.
Bas júldeni Shortandy aýdanynyń sýretshisi, qolóner sheberi Kárim Bektas jeńip aldy, ol baıqaýǵa ár túrli janýarlardyń óńdelgen súıekterinen jasalǵan buıymdardy usyndy. Birinshi oryndy Qosshy qalasynan Ashat Bozymbaı, ekinshi oryndy Kókshetaýdan Kenjebaı Smaǵul, úshinshi oryndy Ereımentaý aýdanynan Álem Nahshır ıelendi.
Jeńimpazdar men júldegerler dıplomdarmen, alǵys hattarmen jáne estelik syılyqtarmen marapattaldy.
