Aqmola oblysynda úzdik pedagogtar marapattaldy
KÓKShETAÝ. QazAqparat - Aqmola oblysynda Ustazdar kúnine arnalǵan saltanatty shara ótip, úzdik pedagogtarǵa túrli marapattar tabystaldy, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Óńirde sońǵy on jylda ustazdar dınastııalarynyń sany aıtarlyqtaı artty. Zerendi aýdany Qyzyltań aýylyndaǵy Jaıyqbaevtar otbasynyń pedagogıkalyq eńbek ótili 427 jyldy quraıdy. Bul týraly búgin aımaq basshysy Ermek Marjyqpaev Ustazdar kúnine arnalǵan saltanatty jıynda atap ótti.
«Mektepte erekshe qabileti men daryny bar, eń bastysy, balalardy súıe biletin adam jumys isteýi kerek. Ondaı jandar bizde óte kóp. Ákesi, uldary, qyzdary, kelinderi, nemereleri, endi, mine shóbereleri ózderi úshin osy kásipti tańdap, adam qyzyǵarlyq sabaqtastyq, tańdaǵan isine súıispenshilik tanytyp keledi», - dedi aımaq basshysy E.Marjyqpaev.
Oblystyń talantty pedagogtarynyń urpaqtary arasynda Ermek Marjyqpaev Kókshetaýdan Muqyshevtardyń, Stepnogorskiden Ahmetovterdiń, Atbasar aýdanynan Býrtovtar men Pakınıgısterdiń janıaularyn aıta kele, elimizdiń keleshek urpaǵan tárbıeleýde qosyp otyrǵan úlesterine shynaıy alǵysyn bildirdi.
Óńir basshysy memleket tarapynan pedagogtyń mártebesin arttyrý úshin keshendi sharalar qolǵa alynyp otyrǵanyna nazar aýdardy. Kadrlardy daıyndaý sapasyna, olardyń kásibı biliktiligin jaqsartýǵa, laıyqty jalaqymen qamtamasyz etýge kóp kóńil bólinýde. Sońǵy eki jylda jańa júıe boıynsha 5 myńnan asa muǵalim attestatsııadan ótti. Olar qazirgi ýaqytta laýazymdyq kesimdi jalaqylaryna 30-dan 50 paıyzǵa deıin ústemeaqy alyp otyr.
«Bilim berý júıesin damytýǵa qosqan eleýli úlesteri men kóp jylǵy qajyrly eńbekteri úshin Arshaly, Zerendi, Tselınograd, Jaqsy, Bulandy aýdandarynan kelgen muǵalimder Dosan Baltashev, Maqpal Bekmaǵanbet, Baıdildá Elýbaev, Farıda Jaqaýova, Lıýbov Matvıenko Qazaqstan Respýblıkasy Prezıdentiniń Alǵys hatymen nagradtaldy. Oblys ákimi pedagogtarǵa vedomstvolyq nagradalar men alǵys hattar, saýyqtyrý ortalyqtaryna joldamalar tabys etti. Sonymen qatar, oblystyń 14 úzdik ustazynyń árqaısysyna 100 myń teńgeniń sertıfıkattary berildi», - deıdi vedomstvodan.
