Aqmola oblysynda úzdik kitaphanashylar anyqtaldy
Jyl saıyn dástúrli túrde ótetin baıqaýdy tamashalaýǵa oblystyń ár óńirinen kelgen kitaphanashylar qatysty. Sharaǵa oblystyq mádenıet basqarmasynyń bastamasyn Maǵjan Jumabaev atyndaǵy oblystyq ámbebap ǵylymı kitaphanasy uıytqy boldy.
«Rýhanı qazyna» baǵdarlamasynyń «Asyl mura» jobasy sheńberinde ótkizilgen baıqaýda ortalyqtandyrylǵan kitaphanalar júıesiniń 7 bıblıografy ózara kásibı sheberlikterin synady.
Baıqaý «Vırtýaldy kitap kórmesi», «Mamandyǵym - maqtanyshym!», «Bıblıografııalyq qııal» atty kezeńderden turdy.
«...Kitap, kitaphana jáne kitaphanashy bular bir-birin jalǵastyryp turǵan, qoǵamdy olarsyz elestetý múmkin emes kıeli uǵym. Ósip kele jatqan keleshek urpaqty osy kitap arqyly ǵana tárbıleýge bolady. Sondyqtan, «Rýhanı jańǵyrý» baǵdarlamasy sheńberinde kitaphana salasy mamandyǵynyń ımıdjin, qoǵamdaǵy bedelin kóterý, búgingi jastardy kitaphana salasyna yntalandyrý jáne jastardyń boıynda ózine tán kásibı sheberlikti joǵarylatý maqsatynda osy baıqaýdy ótkizip otyrmyz», - dedi Aqmola oblystyq mádenıet basqarmasynyń basshysy Sáýle Bóribaeva.
Baıqaý qorytyndysyna saı birinshi oryndy Stepnogorsk qalalyq kitaphanalar júıesiniń bıblıografy Larısa Salenko jeńip aldy. Al júldeli ekinshi jáne úshinshi oryndardy Tselınograd aýdandyq ortalyqtandyrylǵan kitaphanalar júıesiniń bıblıografy Aısholpan Shákenova men Sandyqtaý aýdandyq ortalyqtandyrylǵan kitaphanalar júıesiniń bıblıografy Olga Gmrıa tıisinshe ıelendi. Jeńimpazdarǵa arnaıy dıplomdar men baǵaly syılyqtar tapsyryldy.
