Aqmola oblysynda úzdik kelin anyqtaldy
KÓKShETAÝ. QazAqparat - Aqmola oblysynyń Tselınograd aýdanynda «Kelin - otbasymyzdyń yrysy» atty kelinderi baıqaý ótti. Saıysqa qatysýshylar salt - dástúrdi, mádenıet-turmys ádet-ǵuryptaryn pash etti, dep habarlaıdy QazAqparat tilshisi aýdandyq ishki saıasat bólimine silteme jasap.
Qyz bala boı jetip, aq bosaǵadan attap, bir úıdiń, bir áýlettiń kelini atanýy - ejelden kele jatqan qazaq dástúri. Ulttyq tárbıeni ón boıyna daryta alǵan qyz bala sol áýlettiń tútinin tútetip, shańyraǵyn bıiktetip, aýyl-aımaqqa qadirli bolyp ketedi. Qazaq kelini qashan da otbasyndaǵy aýyzbirshiliktiń uıytqysy bolǵan.
«Kelinder baıqaýynyń basty maqsaty da - osy ulaǵatty salt-dástúrimizdi jalǵastyrý, qazaq kelinderiniń beınesin dáripteý, jas urpaqqa úlgi-ónege kórsetý. Ulttyq kıim kıip shyqqan kelinder sahna tórinde besik terbetip, besik jyryn aıtty. Ár nómirde qatysýshylar otbaslyq qundylyqtardy nasıhattady», - dep atap ótti Tselınograd aýdandyq ishki saıasat bólimindegiler.
Baıqaýǵa Arshaly, Astrahan, Tselınograd, Qorǵaljyn, Ereımentaý jáne Aqkól aýdandarynan kelgen kelinder qatysyp, baqtaryn synady.
Jeńimpazdar «Meniń otbasym - meniń baqytym!», «On saýsaǵynan óner tamǵan...», «Kelin bolýdyń syrlary», «Ult tárbıesiniń saqshylary» jáne «Ónerliniń órisi keń» sııaqty kezeńder boıynsha anyqtaldy.
Saıys qorytyndysy boıynsha tórt kelin «Ónerli kelin», «Sheber kelin», «Kórkem kelin» jáne «Bilimdi kelin» atalymdary boıynsha jeńimpaz dep tanylsa, Tselınograd aýdany atynan qatysqan kelin Ómirhan Razyhan 3-shi dárejeli laýret atandy. Ekinshi oryndy ereımentaýlyq Ámına Omarova, birinshi orynǵa arshalylyq Aıdana Sembıeva ıe boldy. Al Gran-prı taǵy bir Tselınograd aýdanynyń kelini Janna Sarınaǵa berildi.
