Aqmola oblysynda úzdik kásipkerler marapattaldy
Oblystyq kásipkerlik jáne ónerkásip basqarmasynyń málimetinshe, «2020 jyly shaǵyn jáne orta kásipkerlikti damytýdaǵy jetistikteri úshin» óńirlik baıqaýyna tórt atalym boıynsha 25 ótinim qabyldandy: «Úzdik ınnovatsııalyq joba» - 4 ótinim, «Úzdik jas kásipker» - 5 ótinim, «Úzdik kásipker áıel» - 12 ótinim, «Úzdik startap» - 4 ótinim.
«Baıqaýǵa oblystyń 11 óńirinen - Kókshetaý qalasy, Stepnogorsk qalasy, Zerendi, Ereımentaý, Astrahan, Atbasar, Tselınograd, Jarqaıyń, Býrabaı, Birjan sal, Qorǵaljyn aýdandaryna shaǵyn jáne orta bıznes ókilderi qatysty», - deıdi basqarma basshysynyń orynbasary Jaslan Aıdrahmanov.
Baıqaý komıssııanyń sheshimi boıynsha «Úzdik jas kásipker» atalymynda kompıýterler men perıferııalyq jabdyqtardy jóndeýmen aınalysatyn «Saıan» jeke kásipkerliginiń basshysy Saǵymbaı Botpaev (Ereımentaý aýdany) jeńimpaz bolyp tanyldy.
«Úzdik kásipker-áıel» atalymynda sút satyp alý jáne qaıta óńdeýmen aınalysatyn «Nur-A» áleýmettik kásipkerlik koorporatsııasynyń dırektory Gúlbarshyn Qojahmet (Astrahan aýdany) úzdik atandy.
«Úzdik startap» atalymynda «Beslim» fıtnes klýby» saý dene kabınetiniń ıesi - «Vıta» jeke kásipkerliginiń (Atbasar qalasy) dırektory Oksana Zdorovets laıyq dep tanyldy.
«Úzdik ınnovatsııalyq joba» atalymynda ishki týrızm salasynda qyzmet kórsetetin «Parýs» jeke kásipkerliginiń basshysy Arman Sultanov júldeger atandy.
