Aqmola oblysynda úı qustary qyrylǵan aýylǵa shekteý sharalary engizildi
KÓKShETAÝ. QazAqparat – Aqmola oblysynda úı qustary jappaı qyrylǵan aýylǵa shekteý sharalary engizildi, dep habarlaıdy QazAqparat tilshisi.
Oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń málimetinshe, Jarqaıyń aýdanynyń Shoıyndykól aýylynda 200-den astam úı qusy (qaz, úırek, taýyq) ólgen. Qustardyń jappaıy qyrylýy aýyldaǵy 65 úıdiń 19-ynda tirkelgen. Qustardyń ólimine qus tumaýy kúdik týǵyzyp otyr.
«Veterınarlyq qyzmetter úı-úıdi aralap, tekserýde. Turǵyndardyń arasynda qus tumaýymen aýrý oqıǵasy tirkelgen joq. Aýdan ákiminiń qaýlysy jáne aýdandyq shtabtyń sheshimen Shoıyndykól aýylyna shekteý engizildi. Onyń ishinde, úı qustarynyń barlyq túriniń qozǵalysyna, asa qajettilik bolmasa aýyl turǵyndarynyń júrip-turýyna tyıym salyndy», - dedi vedomstvodan.
Turǵyndar arasynda qus tumaýyn boldyrmaý jáne indettiń taralýynyń aldyn alý boıynsha Jarqaıyń aýdandyq ákimdigi, aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasy jáne veterınarlyq qyzmet mamandary túsindirý jumystaryn júrgizýde.
Elimizde qus tamýynyń taralýyna baılanysty Aqmola oblysy aýmaǵynda keshendi sharalar qolǵa alynǵan bolatyn.
QR Aýyl sharýashylyǵy mınıstrliginiń málimetine sáıkes, Qazaqstanda qus tumaýy 5 óńir aýmaǵynda tirkelip otyr.
Vıtse-mınıstr Gúlmıra Isaeva qus tumaýynyń el aýmaǵynda órshý sebebin, sharýa ıelerine ótemaqy tóleý sharttaryn túsindirdi.
Sondaı-aq indettiń adamǵa qaýpi bar-joǵyn aıtyp berdi.
