Aqmola oblysynda úsh aýysymdy oqytý máselesi qalaı sheshilýde
KÓKShETAÝ. QazAqparat - Aqmola oblysynda «Bilimdi ult» sapaly bilim berý» ulttyq jobasyn oryndaý aıasynda mektepterde úsh aýysymdy oqytýdy joıý boıynsha keshendi jumystar júrgizilýde, dep habarlaıdy QazAqparat tilshisi oblystyq ishki saıasat basqarmasyna silteme jasap.
Aqmola oblystyq bilim basqarmasynyń málimetinshe, sońǵy birneshe jylda óńirde mektepter salynyp, jańa mekemeler men oqý korpýstarynyń qurylysy jalǵasýda. Tek ótken jyly Tselınograd aýdany Razdolnoe aýylynda 80 oryndyq mektep, Kókshetaý qalasynda 600 jáne 360 oryndyq qosymsha oqý korpýstary salyndy.
«Búginde óńirde 4500 oryndyq 6 mekteptiń qurylysy júrip jatyr. Onyń ishinde Tselınograd aýdanynyń Shubar, Arshaly aýdanynyń Jibek joly jáne Jaltyrkól aýyldarynda árqaısysy 300 oryndyq, Qosshy jáne Kókshetaý qalalarynda árqaısysy 1200 oryndyq 2 mektep bar. Sonymen qatar, 2022 jylǵa oblystyq bıýdjetten 600 oryndyq Tselınograd aýdanynyń Qarajar aýylynda mektep salý úshin jobalyq smetalyq qujattamasyn jáne memlekettik synamasyn ázirleýge qarajat bólindi», - dedi vedomstvonyń oqý-materıaldyq bazasyn nyǵaıtý jáne damytý bóliminiń basshysy Áset Dúısembaev.
Eske sala ketsek, 2022 jyly oqýshylar sanynyń artýyna baılanysty úsh aýysymda oqytý 7 mektepte júrgiziledi. Onyń 1-ýi Kókshetaý qalasynda, 4-ýi Tselınograd aýdanynda jáne 2-ýi Arshaly aýdanynda. Oblys mektepterinde úsh aýysymdy oqytý máselesin 2024 jylǵa deıin sheshý josparlanyp otyr.
