Aqmola oblysynda úsh aýysymdy bilim berý máselesi qalaı sheshilýde
KÓKShETAÝ. QazAqparat – Aqmola oblysynyń ákimi Ermek Marjyqpaev óńirde úsh aýysymdy bilim berý máselesi qalaı sheshilip jatqandyǵyn aıtty, dep habarlaıdy QazAqparat tilshisi.
«Óńirde 3892 oryndyq segiz mekteptiń qurylysy júrgizilýde. Onyń ishinde Tselınograd aýdanyndaǵy Qosshy aýylynda 1200 oryndyq, Maksımovka aýylynda 300, Ótemis aýylynda 120 jáne Razdolnoe aýylyndaǵy 80 oryndyq eki mektep bar. Arshaly aýdanynda Jibek Joly jáne Jaltyrkól aýyldarynda 300 oryndyq eki mektep, sondaı-aq, oblys ortalyǵynda 392 orynǵa arnalǵan oqý – tárbıe kesheni salynýda», - dedi Ermek Marjyqpaev.
Aımaq basshysynyń aıtýynsha, bıyl Kókshetaýdaǵy №1 jáne №4 orta mektepterge 600 jáne 360 oryndyq qosymsha oqý korpýstaryn paıdalanýǵa berý josparlanýda.
«Jalpy, óńirde úsh aýysymdy oqytý máselesin aldaǵy eki jylda sheshýdi josparlap otyrmyz», – dedi Ermek Marjyqpaev.
Sonymen birge, ákim «Jumyspen qamtýdyń jol kartasy» baǵdarlamasy jáne «Aýyl – El besigi» arnaıy jobasy boıynsha oblysta alǵash ret 10 mıllıard teńgege 147 bilim berý nysany jóndelgenin atap ótti.
