Aqmola oblysynda úsh aýysymda oqytý máselesi birtindep sheshilýde
KÓKShETAÝ. QazAqparat - Aqmola óńirinde orta bilim berý sapasyn arttyrýǵa kóp kóńil bólinýde. Úsh aýysymdy oqytýdy joıý ózekti máselelerdiń biri sanalady, dep habarlaıdy QazAqparat oblystyq ishki saıasat basqarmasynyń baspasóz qyzmetine silteme jasap.
Jýyrda Tselınograd aýdany Qoıandy aýylynda 1200 oryndyq jańa mektep paıdalanýǵa berildi. Oblystyq bilim basqarmasynyń baspasóz qyzmetindegiler atap ótkendeı, jańa bilim berý mekemesinde balalar eki aýysymda oqıdy. Birinshi aýysymda 904 oqýshydan 40 synyp, ekinshi aýysymda 392 oqýshydan 18 synyp bolady. Bilim berý uıymynda eki sport zaly jáne 600 oryndyq eki jaqty kıim sheshetin bólme bar. Mektep aýmaǵynda jasandy jabyndy sport alańy jáne eki shaǵyn fýtbol alańy bar. Mektepte barlyq oqý pánderi boıynsha 57 kabınet jumys isteıdi.
Sondaı-aq, úsh aýysymda oqytý máselesin jaqsartý maqsatynda Kókshetaý qalasynyń №13 «Ekos» ekologııalyq mektep-gımnazııasyna japsarlana salynǵan ǵımarattyń qurylysy aıaqtaldy.
«Mektep ǵımaratyna japsarlana salynǵan korpýsta 22 oqý kabıneti ornalasqan. Muǵalimderdiń jumys oryndary ınternetke shyǵatyn statsıonarlyq kompıýterlermen jabdyqtalǵan. 30 noýtbýkpen eki mýltımedııalyq kabınet, qazaq jáne aǵylshyn tilderiniń eki mobıldi kabıneti, kitaphana, qajetti qural – jabdyqtarmen jabdyqtalǵan jańa sport zaly, dýsh bólmesi, garderob, keń ashana bar», - deıdi vedomstvodan.
Sonymen qatar, mektep aýlasynda fýtbol alańy, oıyn alańdary jáne demalýǵa arnalǵan shatyrlar salynǵan. Bıyl oblysta 2,5 myńnan astam oryndyq taǵy alty mekteptiń qurylysyn aıaqtaý josparlanyp otyr. Tselınograd aýdanynda Qosshy aýylynda 1200 oryndyq, Ótemis aýylynda 120 oryndyq, Maksımovka aýylynda 300 oryndyq jáne Arshaly aýdanynda Jibek Joly, Jaltyrkól aýyldarynda 300 oryndyq, sondaı-aq 392 oryndyq oqý-tárbıe kesheni bar.
