Aqmola oblysynda urlanǵan 236 mal úsh kúnniń ishinde ıelerine qaıtaryldy
KÓKShETAÝ. QazAqparat - Aqmola oblysynda 3 kúnde mal urlyǵyna qatysty 20 qylmystyń betin ashylyp, 236 mal ıelerine qaıtaryldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń deregi boıynsha, jeltoqsannyń 5-nen bastap, óńirde «Mal urlyǵy» jedel aldyn alý sharasy júrgizilýde. Sharanyń maqsaty, mal urlyǵynyń aldyn alý, eskertý jáne maldy qujatsyz tasymaldaýdyń jolyn kesý.
Osy baǵytta oblys boıynsha avtokólik joldarynyń boıyna qosymsha 30 mobıldi top qoıyldy. Top táýlik boıy mal jáne et ónimderin tasymaldaýshylardy toqtatyp, qujattaryn tekserýde. Sharanyń alǵashqy úsh kúniniń ishinde polıtsııa qyzmetkerleri 80-nen astam avtokólikti tekserip, qujatsyz mal jáne et ónimderin tasymaldaýǵa qatysty 13 oqıǵany anyqtady.
Sonymen qatar, shaǵyn bazar, et kombınaty jáne shujyq tsehtary, mal jáne et ónimderin satý jáne satyp alý oryndary tekserildi. Ásirese, aýdan ortalyqtary men qalalarǵa kireberis joldyń boıyna nazar aýdaryldy.
«Mal urlyǵy» jedel aldyn alý sharasynyń alǵashqy úsh kúniniń ishinde mal urlyǵyna qatysty 20-dan qylmys anyqtaldy. Onyń 18-i buryn jasalǵan. Bul qylmystarǵa qatysy bar 16 adam ustaldy.
Budan bólek, jedel izdestirý sharasy barysynda joǵalǵan 236 mal ıelerine qaıtaryldy. Máselen, Esil aýdanynda Orlovka aýylynyń turǵynyna jaılymnan joǵalyp ketken 44 bas jylqysy qaıtaryldy. Iesiniń aıtýynsha, shyǵyn kólemi 3,5 mıllıon teńgege baǵalandy. Arnaıy qurylǵan top jedel izdestirý sharasy barysynda joǵalǵan jylqylardy Jaqsy aýdanynyń aýmaǵynan tapty. Osyndaı jaǵdaı Ereımentaý aýdanynda da oryn aldy.
Jergilikti sharýa qojalyǵynyń basshysy polıtsııaǵa aryz túsirip, joǵalǵan 25 bas jylqysyn taýyp berý týraly kómek suraǵan. Kásipkerdiń jylqylary arada birneshe kún ótken soń Qaraǵandy aýdanynyń Osakarovka aýdany aýmaǵynan tabyldy», - dep kórsetilgen baspasóz qyzmetindegiler.
