Aqmola oblysynda ýly gaz datchıginiń arqasynda bir otbasy aman qaldy
KÓKShETAÝ. QazAqparat – Aqmola oblysynda ýly gazdy anyqtaıtyn dachıktiń arqasynda bes adamnan turatyn bútin bir otbasy aman qaldy, dep habarlaıdy QazAqparat tilshisi.
Oblystyq TJD baspasóz qyzmetiniń málimetinshe, Aqsý kentinde túngi ýaqytta jeke turǵyn úıden órt shyqqan. Úıde jalǵyzbasty áıel men onyń úsh balasy jáne aǵasy uıyqtap jatqan. Buǵan deıin Stepnogor qalalyq ákiminiń qoldaýymen «Órt qaýipsizdigi kúni» aktsııasy sheńberinde atalmysh úıge ýly gazdy anyqtaıtyn datchık ornatylǵan eken. Órt shyqqan kezde osy qurylǵy iske qosylǵan.
«Oqıǵa ornyna dereý Stepnogor qalalyq qutqarý-órt sóndirý bólimshesiniń jeke quramy men kúshteri, «Stepnogor EPZ» AQ jumysshylary jumyldyryldy. Órt 28 sharshy metr aýmaqty sharpydy. Ýly gazdy anyqtaıtyn datchıktiń arqasynda bes adamnan turatyn bútin bir otbasy syrtqa shyǵyp aman qaldy», - deıdi vedomstvodan.
Aıta keteıik, Aqmola oblysynda jylytý maýsymy bastalǵannan beri úılerge osyndaı 763 datchık ornatylǵan.
