Aqmola oblysynda ulttyq sport túrlerinen respýblıkalyq jarys ótti
KÓKShETAÝ. QazAqparat – Kókshetaý qalasynyń irgesindegi Krasnoıar aýylynda Qurban aıt merekesine oraı ulttyq sport túrlerinen jarys ótti, dep habarlaıdy QazAqparat tilshisi Aqmola oblysy boıynsha Sybaılas jemqorlyqqa qarsy is-qımyl departamentiniń baspasóz qyzmetine silteme jasap.
«Qulager» ıppodromynda ótken jarysqa oblystyń ár óńirinen jınalǵan sportshylar qatysty. Shara «Aqmola – adaldyq alańy» jobasynyń aıasynda uıymdastyrylyp, adal jáne ádil sportty nasıhattaýǵa baǵyttaldy.
Jarysty kópshilikpen birge tamashalaýǵa «Naýan Haziret» meshitiniń bas ımamy Sábıt Qýanysh, Kókshetaý qalasynyń ákimi Amangeldi Smaıylov, Aqmola oblysy boıynsha sybaılas jemqorlyqqa qarsy is-qımyl departamentiniń basshysy Murat Tóleýbaev pen onyń orynbasary Arman Berdalın keldi.
Qatysýshylar taı jarys, kókpar, qazaqsha kúres, asyq atý, toǵyzqumalaq oıyndarynan synǵa tústi.
Kórermender taı jarysta eń myqty ataǵy úshin shabandozdardyń keremet jarysyn tamashalady. Sondaı-aq kókparda baq synaǵan sportshylar jankúıerlerge naǵyz emotsııa syılady. Asyq atý oıynyna balalarmen qatar úlkender de qatysty.
Jarys qorytyndysy boıynsha sportshylar aqshalaı syılyqpen marapattaldy. Jınalǵan qaýymǵa kontserttik baǵdarlama men qazaq kıiz úılerindegi merekelik dastarhan uıymdastyryldy.
«Biz adal sportty tańdap, sportshylardy da adal bolýǵa shaqyramyz. Óziniń dostaryna, ne bolmasa básekelesterine ádiletsizdik tanytý durys emes. Sebebi árkim tek óz eńbegimen jáne óz kúshimen tabysqa jetýi tıis» - dep esepteıdi «Aqmola – adaldyq alańynyń» ókilderi.
