Aqmola oblysynda «Ulttyq ertegiler kerýeni» street fest uıymdastyryldy
Aqmola oblysynyń mádenıet, arhıvter jáne qujattamalar basqarmasy baspasóz qyzmetiniń málimetinshe, ulttyq ertegiler keıipkerlerimen bezendirilgen kólik kerýeni Kókshetaý qalasynyń ortalyq kóshelerimen júrip ótti. Erekshe kerýen «Táýelsizdik» alańynan bastalyp, qalanyń shetki aýdandaryna deıin bardy.
«Qazaq aýyz ádebıetiniń sonaý dáýirden kele jatqan rýhanı qazynasynyń biri – ertegi. Halqymyzdyń salt-dástúri men ádet-ǵurpy halyq ertegilerinde kórinis tabady. Ertegimen balaǵa tárbıe berip, salt-dástúrin sol qalpynda saqtap qalǵan. «Ulttyq ertegiler kerýeni» street fest uıymdastyrýdaǵy maqsat - ertegilerdiń halyq aýyz ádebıetinde eń mańyzdy oryn alatyn rýhanı qazynasy ekenin nasıhattaý», - deıdi Aqmola oblysynyń mádenıet, arhıvter jáne qujattamalar basqarmasy baspasóz qyzmetindegiler.
Shara barysynda Qańbaq shal, Jalmaýyz kempir, Ertóstik jáne Alpamys tárizdi ertegi keıipkerleri kókshetaýlyqtar men qala qonaqtaryn Naýryz meıramymen quttyqtap, merekelik kóńil kúı syılady.
