Aqmola oblysynda Ulttyq dombyra kúnine oraı kúıshiler saıysy ótti

KÓKShETAÝ. QazAqparat – Ulttyq dombyra kúnine jáne qazaqtyń uly kúıshi-kompozıtory Qurmanǵazy Saǵyrbaıulynyń 205 jyldyǵyna arnalǵan «Kúmbirlegen kúmis kúı» oblystyq kúıshiler baıqaýy ótti, dep habarlaıdy QazAqparat tilshisi.

Aqmola oblystyq Mádenıet basqarmasy baspasóz qyzmetiniń málimetinshe, kúı ónerin Qurmanǵazynyń mýzykalyq murasy, halyq shyǵarmashylyǵynyń janry retinde saqtaý jáne dáripteý, sondaı-aq dombyrany qazaq halqy tarıhynyń ajyramas bóligi retinde nasıhattaý, kásibı sheberlikti arttyrý, tájirıbe almasý jáne jańa talanttardy anyqtaý maqsatynda uıymdastyrylǵan baıqaý eki kezeńnen turdy.

«Alǵashqy irikteý kezeńine Aqkól, Astrahan, Atbasar, Bulandy, Býrabaı, Jaqsy, Zerendi, Qorǵaljyn, Shortandy aýdandary men Stepnogorsk, Qosshy jáne Kókshetaý qalalarynan 18-35 jas aralyǵyndaǵy 20-dan astam kúıshi qatysyp, baq synady. Myqty degen 12 kúıshi aqtyq saıysqa joldama aldy», – dedi vedomstvodan.

Baıqaýǵa Birjan sal atyndaǵy mýzykalyq kolledjiniń oqytýshysy, Halyqaralyq «Shabyt» festıvaliniń laýreaty Sáken Birjanov, respýblıkalyq baıqaýlardyń jeńimpazdary men laýreattary Saıat Babaev jáne Baýyrjan Baltın qazylyq etti.

Basqarmanyń baspasóz qyzmetinen atap ótkendeı, «Kúmbirlegen kúmis kúı» oblystyq kúıshiler baıqaýynyń júldegerleri 2 shildede Ulttyq dombyra kúnine arnalǵan «Dombyra» atty flesh-mob-ta marapattalady.

Atalǵan sharada 1,5 myńǵa jýyq aqmolalyq kásibı dombyrashy, Úkili Ybyraı atyndaǵy Aqmola oblystyq fılarmonııasynyń K.Kúmisbekov atyndaǵy qazaq ulttyq aspaptar orkestri, dombyrashylar ansambli men kúı mektebiniń shákirtteri birlesip, qazaq halyq kompozıtorlarynyń kúılerin oryndaıdy.

Aıta ketsek, budan buryn Aqmola oblysyndaǵy ótken alaman báıgede 8 jastaǵy shabandoz birinshi oryn alǵanyn jazǵan edik.