Aqmola oblysynda túrli etnos ókilderi arasynda memlekettik tildi úzdik meńgergender anyqtaldy

KÓKShETAÝ. QazAqparat - Qazaqstan halqy tilderiniń onkúndigi aıasynda Aqmola oblysynda Táýelsizdiktiń 30 jyldyǵyna arnalǵan memlekettik tildi meńgergen túrli etnos ókilderi arasynda «Memlekettik til – Táýelsizdik sımvoly» atty onlaın-baıqaý ótti, dep habarlaıdy QazAqparat oblystyq ishki saıasat basqarmasyna silteme jasap.

Іs-sharaǵa oblystyń aýdandary men qalalarynan túrli qyzmet salasyndaǵy 14 úmitker qatysty.

Baıqaý memlekettik tildiń qoldanys aıasyn keńeıtý, qazaq tiliniń etnosaralyq qarym-qatynas tili retindegi qyzmetin nyǵaıtý, memlekettik tildi meńgergen túrli etnos ókilderin yntalandyrý maqsatynda ótkizildi.

Uıymdastyrýshylardyń atap ótýinshe, baıqaýdyń birinshi kezeńinde qatysýshylar qysqa metrajdy beınerolıkter usyndy, onda olar qazaq tilin úırenýdegi múdde men jetistikter týraly aıtyp berdi, belgili qazaq aqyndary men jazýshylarynyń shyǵarmalarynan úzindiler oqydy. Ekinshi kezeńde qatysýshylar «Til men Táýelsizdik egiz uǵym» taqyrybynda oı tolǵady.

Baıqaý qorytyndysy boıynsha birinshi orynǵa Tselınograd aýdany Araıly aýyly orta mektebiniń qazaq tili men ádebıeti pániniń muǵalimi Anastasııa Irýbaeva ıe boldy. Ekinshi oryndy Kókshetaý qalasynyń «Zerek» balabaqshasynyń tárbıeshisi Anastasııa Kravchenko, úshinshi oryndy Esil aýdany Y.Altynsarın atyndaǵy Igilik negizgi orta mektebiniń pedagog - psıhology Radmıla Bıgýjanova ıelendi.

«Óz basym memlekettik tildi meńgerý ár bir azamattyń paryzy jáne mindeti dep bilemin. Qazaq tilin meńgerip qana qoımaı qazaq tilinde balalarǵa bilim berý men úshin úlken baqyt», - dep Anastasııa Irýbaeva óz oıymen bólisti.

Baıqaýdyń jeńimpazdary men qatysýshylary dıplomdar, alǵys hattar jáne baǵaly syılyqtarmen marapattalady.

Aıta keteıik, baıqaýdyń aımaqtyq kezeńiniń jeńimpazy qarasha aıynda ótetin respýblıkalyq baıqaýda Aqmola oblysynyń namysyn qorǵaıtyn bolady.