Aqmola oblysynda Túrkııa azamaty kóligimen lokomotıvke soǵyldy
KÓKShETAÝ. QazAqparat – Aqmola oblysynda Túrkııanyń 34 jastaǵy azamaty tizgindegen «Mercedes» kóligi lokomotıvpen soqtyǵysty, dep habarlaıdy QazAqparat tilshisi.
Oblystyq Polıtsııa departamentiniń baspasóz qyzmetinen málim etkendeı, 22 qańtarda Esil aýdandyq PB kezekshi bólimine belgisiz adam habarlasyp, Esil aýdanynyń Aqsaı aýyly mańynda jol-kólik oqıǵasy bolǵanyn aıtqan.
«Tekseris barysynda anyqtalǵandaı, «Jaqsy-Esil-Buzylyq» avtomobıl jolynyń 71-shaqyrymynda Túrkııanyń 34 jastaǵy azamaty tizgindegen «Mercedes» kóligi kúzetilmeıtin temirjol ótkelindegi baǵdarshamnyń qyzyl túsine qaramastan, joldy kesip ótpek bolǵan. Osy kezde 51 jastaǵy mashınıst basqaryp kele jatqan lokomotıv kólikpen soqtyǵysqan. Zardap shekkender joq», - dedi vedomstvodan.
Osyǵan baılanysty tártip saqshylary Túrkııa azamatyna qatysty QR QK-niń 610-baby 1-bóligi («Adamdardyń densaýlyǵyna zııan keltirý, kólik quraldaryn nemese ózge de múliktiń búlinýine ákelip soqtyrǵan kólik quraldary júrgizýshileriniń jol erejesin buzýy») boıynsha ákimshilik hattama toltyrdy.
