Aqmola oblysynda Túrki keńesiniń halyqaralyq jazǵy lageri esigin aıqara ashty
Zerendi kóliniń jaǵasyndaǵy «Avrora Garden» demalys ornynda ótken sharaǵa QR Din isteri jáne azamattyq qoǵam vıtse-mınıstri Abzal Núkenov qatysyp quttyqtaý sóz sóıledi.
«Elbasy Nursultan Nazarbaev «Bolashaqqa baǵdar: rýhanı jańǵyrý» atty maqalasynda aıtylǵandaı ósip kele jatqan keleshek urpaqty jastaıyn tarıhı qundylyqtarǵa tárbıeleýge zor kóńil bólinip otyr. Osy oraıda, baýyrlas elder jastarynyń arasynda tyǵyz baılanys ornatý mańyzdy. Búgingi uıymdastyrylyp otyrǵan Túrki keńesiniń halyqaralyq jazǵy lageri sol úrdisten shyǵady dep oılaımyn. Qazirgi kezde, Zerendi jerinde tórt elden jınalǵan 100-ge jýyq jastar qatysýda. Bul lager bizdiń elimizde tuńǵysh ret uıymdastyrylyp otyr. Munda baýyrlas elderdiń jastary bir-birimen tyǵyz qarym qatynas ornatyp, osyndaı aýqymdy sharany jyl saıyn dástúrli túrde ótkizip otyrady dep senemin», - dedi Abzal Núkenov.
Uıymdastyrýshylardyń aıtýynsha atalmysh lager shilde 10-16 aralyǵyna deıin ótpek. Oǵan Túrkııa, Ázerbaıjan, Qyrǵyzstan jáne Qazaqstannan jınalǵan júzge jýyq belsendi jastar qatysýda. Sharaǵa QR Din isteri jáne azamattyq qoǵam mınıstrliginiń qoldaýymen «Nur Otan» partııasy «Jas Otan» jastar qanatynyń uıymdastyrýymen ótip otyr.
Shara barysynda ár elden kelgen jastardyń ókilderi sóz sóılep, jyly lebizderin bildirdi. Shara jergilikti jas ónerpazdardyń oryndaýyndaǵy kontserttik baǵdarlama men «Zeren» demalys ornyndaǵy «galstýksiz» kezdesýge ulasty.
