Aqmola oblysynda týrızm salasyn damytýdyń negizgi baǵyttary anyqtaldy
KÓKShETAÝ. QazAqparat - Aqmola oblysynda týrızm salasyn damytýdyń negizgi basymdyqtary anyqtaldy. Bul týraly óńirlik kommýnıkatsııalar qyzmetinde ótken brıfıngte oblys ákiminiń orynbasary Marat Iǵalı aıtyp berdi, dep habarlaıdy QazAqparat tilshisi.
Marat Iǵalıdiń aıtýynsha, Aqmola oblysy demalys oryndaryna baı, Qazaqstan Respýblıkasyndaǵy týrıstik aımaqtardyń úzdik bestigine kiredi.
«Óńirde týrızm salasynda 700-den astam kásiporyn jumys isteıdi. Aldyn ala málimetter boıynsha, ótken jyly Aqmola oblysyna 1 mıllıonnan astam týrıst keldi, dep atap ótti Mara Iǵalı. - Oblystyń týrıstik ınfraqurylym damytý sheńberinde 2018 jyly quny 4,3 mıllıard teńge bolatyn 32 ınvestıtsııalyq joba júzege asyrylyp, 340 jumys orny ashyldy. Oblys aýmaǵynda «Býrabaı», «Buırataý», «Kókshetaý» tárizdi 3 memlekettik ulttyq tabıǵı parki men Qorǵaljyn memlekettik tabıǵı qoryǵy jáne 900-ǵa jýyq mádenı eskertkish bar».
Sonymen qatar, aımaq basshysynyń orynbasary Aqmola oblysy ákimdigi men «QazAvtoJol» UQ» AQ arasynda kelisim arqyly oblys aýmaǵynda «KazWay» modýldi tıpti, halyqaralyq standarttarǵa saı 9 servıstik pavılon ornatylǵanyn atap ótti. Onyń sózinshe, týrıstik salada «Şýche-Býrabaı» kýrortty aımaǵyn damytýǵa erekshe mán beriledi.
Býrabaı kýrortynyń tartymdylyǵyn arttyrý jáne bıznesti tartý arqyly jyl boıyna júktemeni qamtamasyz maqsatynda «Four seasons» tujyrymdamasy júzege asyrylýda. Vızıt ortalyǵynda tarıhı-ólketaný murajaıy jáne Botaı mádenıeti murajaıy qurylyp, «Jaılaý» etnoaýyly jáne avtokempıng ashyldy. Strıt-fýt jelisi (20 saýda pavılony) uıymdastyryldy. «AsiaWaters» kompanııasy «Qulager Burabay» emdik-as sýymen týrıstik nysandardy qamtamasyz etýdi qolǵa aldy. «Hotel Plaza» qonaqúı kesheninde elimizdegi tuńǵysh «Týrızm jáne servıs akademııasy» ashyldy.
Qyzmet qunyn azaıtý maqsatynda týrpaketterdi 50 paıyzǵa deıin arzanǵa satatyn «Burabay City Pass» elektrondy jelisi iske qosyldy. Býrabaı kentinde (14 ga) jańa shaǵynaýdannyń qurylysy bastalyp, ortalyq alań men kósheler abattandyryldy. Býrabaı kóliniń jaǵajaı aýmaǵynda 2 alleıa salynyp, qatty turmystyq qaldyqtardy eki bólip jınaıtyn joba júzege asyrylýda. «I love Burabay» shaǵyn sýálet eskertkishteri men aqparattyq belgiler ornatyldy.
«Osy basymdyqtar arqyly aldaǵy jumystarymyzdyń basty baǵyttary anyqtaldy. Onyń bastylarynyń biri - «Şýche - Zerendi» avto jolynyń qurylysy. Týrıstik nysandardyń qoljetimdiligin arttyrý jáne ondaǵy qyzmet qunyn arzandatý baǵytynda týrıstik nysandarǵa sertıfıkat berý sharasy qolǵa alynýda. Týrızm salasynda ınvestıtsııalyq jobalardy júzege asyrý úshin ınvestorlardy tartý boıynsha jumystar júrgizilýde. Qazaqstan óńirleri men Reseıdiń shekaralas aımaqtarymen áriptestik aıasy keńeıe túsýde. Óńirdiń týrıstik áleýetin arttyrýda áleýmettik jeli belsendi tartylatyn bolady», - dep tolyqtyrdy M.Iǵalı.
