Aqmola oblysynda turǵynǵa dóreki sóılegen ákim jazalandy
Otyrysta Atbasar aýdanyndaǵy Aqan Qurmanov selolyq okrýginiń ákimi Altynaı Bilálova men Esil aýdanynyń Internatsıonalnyı selolyq okrýginiń ákimi Shárbat Rahmanovaǵa qatysty tártiptik ister qaraldy.
Atbasar aýdanynyń shalǵaı aýylynda bolǵan oqıǵanyń oblystyq tártiptik keńeske jetýine Aqan Qurmanov selolyq okrýginiń ákimi Altynaı Bilálovanyń aýyl turǵynyna dóreki sóıleýi sebep bolǵan eken. Bıylǵy jyldyń naýryz aıynda ótken bir kezdesýde okrýg ákimi sol aýyldyń turǵyny Roman Voşenkoǵa «jap aýzyńdy» dep aıtqan kórinedi. Aýyl ákiminiń sol bir aýyz sózi úlken daýǵa negiz bolǵan.
Esil aýdanynyń Internatsıonalnyı selolyq okrýginiń ákimi Shárbat Rahmanova da burynǵy júrgizýshisine ses kórsetken.
«Ádep jónindegi keńes músheleri aqyldasa kele, QR Memlekettik qyzmetshiniń Ádep kodeskiniń 5 tarmaǵy 2, 7 tarmaqshalaryn buzǵany úshin Atbasar aýdany Aqan Qurmanov selolyq okrýginiń ákimi Altynaı Bilálovaǵa «qatań sógis», Esil aýdany Internatsıonalnyı selolyq okrýginiń ákimi Shárbat Rahmanovaǵa «qyzmetinen bosatý» túrindegi tártip jazaǵa tartý jóninde Atbasar jáne Esil aýdandarynyń ákimderine usynys jasaý týraly uıǵarym shyǵardy», dep túsindirdi QazAqparat tilshisiniń saýalyna Aqmola oblysy boıynsha QR Memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmetindegiler.
Vedomstvonyń málimeti boıynsha, Ádep jónindegi keńestiń otyrysynda memlekettik qyzmetshilerdiń tártibinen bólek, Aqmola oblystyq jumyspen qamtýdy jáne áleýmettik baǵdarlamalardy úılestirý basqarmasynyń basshysy Dına Ahmetjanovanyń jemqorlyqqa qarsy kúres baǵytyndaǵy atqarylyp jatqan jumystary jónindegi esebi tyńdaldy.