Aqmola oblysynda turǵyndy urǵan ákim jaýapqa tartyla ma

KÓKShETAÝ. QazAqparat - Memlekettik qyzmet isteri agenttigi Aqmola oblysy boıynsha departamentiniń basshylyǵy Astrahan aýdany Ostrogorsk aýyldyq okrýginiń ákimi T. Qurman týraly áleýmettik jelidegi jarııalanymǵa qatysty túsinikteme berdi, dep habarlaıdy QazAqparat tilshisi.

Beınejazbada Astarhan aýdanyndaǵy Novyı Kolýton aýylynyń turǵyny ulyn urǵan Astrahan aýdany Ostrogorsk aýyldyq okrýginiń ákimi T. Qurmandy jazaǵa tartýdy suraǵan. Áleýmettik jelide jeldeı esken beınejazba keıin óshirilgen. Degenmen, Memlekettik qyzmet isteri agenttiginiń Aqmola oblysy boıynsha departamenti tekseris júrgizip jatyr.

«Memlekettik qyzmet isteri agenttiginiń Aqmola oblysy boıynsha departamenti áleýmettik jelilerde Astrahan aýdany Ostrogorsk aýyldyq okrýginiń ákimi T. Qurmanǵa qatysty kórinis tapqan jarııalanymdar boıynsha istiń mán-jaılaryn zerdelep jatyr. Zerdeleý nátıjeleri boıynsha qyzmetshiniń is-áreketine tıisti quqyqtyq baǵa beriledi. Ádep kodeksine sáıkes memlekettik qyzmetshiler azamattarmen qarym-qatynasta ádeptilik tanytý, dórekilik, qadir-qasıetin kemsitý, ádepsizdik jáne beıádep minez-qulyq faktilerine jol bermeý, ózderiniń áreketterimen jáne minez-qulqymen olardyń tarapynan synǵa sebepker bolmaýy qajet ekendigin habarlaımyz», - dep túsindirdi departament basshysynyń orynbasary Darhan Haırýllın.

Aıta ketsek, budan buryn turǵyndardy jelide balaǵattaǵan Şýche ákimi qatań sógis alǵanyn jazǵan edik.