Aqmola oblysynda turǵyn úı órtenip, eki adam kóz jumdy
KÓKShETAÝ. QazAqparat - Býrabaı aýdanynyń Qarashilik aýylynda jeke turǵyn úı órtenip, eki adam kóz jumdy, dep habarlaıdy QazAqparat tilshisi oblystyq Tótenshe jaǵdaılar departamentiniń baspasóz qyzmetine silteme jasap.
Vedomstvonyń málimetinshe, órt qyrkúıektiń 9-da keshki saǵat 21:40 shamasynda bolǵan. Qyzyl jalyn 60 sharshy metr aýmaqty sharpydy.
«Órtti sóndirýge TJD jeke quramynan 13 qyzmetker jáne 3 órt sóndirý tehnıkasy, Býrabaı aýdanynyń TJB jeke quramynan 8 qyzmetker jáne 3 órt sóndirý tehnıkasy jumyldyryldy. Órt bolǵan úıden 1969 jylǵy er adam men 1981 jylǵy áıeldiń denesi tabyldy», - dedi vedomstvodan.
TJD baspasóz qyzmetinen atap ótkendeı, qazirgi kezde sot-medıtsınalyq saraptama taǵaıyndalyp, órt bolǵan jerde órt zerthanasy jumys isteýde.
Kýágerlerdiń aıtýynsha, qaza tapqandar bul úıge shamamen 2 aı buryn kóship kelgen jáne jergilikti qus fabrıkasynda jumys istegen.
Osy rette, Aqmola oblystyq Tótenshe jaǵdaılar departamentiniń qyzmetkerleri óńir turǵyndaryna elektr symdary men jylytý peshterin jaramdy kúıde ustaý qajettigin eskertedi. Sondaı-aq, alkogoldi ishimdikterdi shamadan tys paıdalaný jáne tósekte temeki shegýge bolmaıtynyn eske salady.
