Aqmola oblysynda tuńǵysh ret óńirlik jármeńke-kórme ótkizilmek
Aǵymdaǵy jyldyń 28 shildesinde Aqmola oblysy kásipkerler palatasynyń uıymdastyrýymen ótetin jármeńke-kórmege oblystyń ár óńirindegi 100-ge jýyq taýar óndirýshi qatysady dep josparlanǵan. Qazirdiń ózinde Atbasar, Býrabaı, Shortandy, Tselınograd, Zerendi, Astrahan, Arshaly, Aqkól aýdandary jáne Stepnogor qalasyndaǵy barlyǵy 54 kompanııa qatysýǵa tilek bildirip otyr. Olardyń arasynda «Qazaqstan Agro Innovatsııalyq Korporatsııasy» JShS, «Kókshetaý sút zaýyty» JShS, «CAPITAL PROJECTS LTD» JShS, «QazOrman kompanııasy» JShS, «Aurora Garden Group» JShS, «AZAM-KC» JShS jáne «Ijevskıı» óndiristik kooperatıvi sııaqty taýar óndirýshiler bar.
Jármeńke kezinde qatysýshylar men qonaqtarǵa et, sút, un, kondıterlik ónimder men sándik qoldanbaly óner týyndylary tárizdi óńirde shyǵarylatyn otandyq ónimder jeńildetilgen baǵamen saýdaǵa shyǵarylady.
Oǵan qosa, utys oıyny uıymdastyrylyp, turmystyq tehnıkalar men syılyqqa sertıfıkattar oınatylatyn bolady.
«Osyndaı aýqymdy sharany qolǵa ala otyryp, biz jergilikti taýar óndirýshilerdiń ónimderin tutynýshylarǵa usynamyz. Oǵan qosa, kásipkerler bıznestegi áriptesterimen betpe bet júzdesip, naryqta bolyp jatqan jańalyqtarmen bólise alady. Osylaısha, jaqyn aralasý arqyly bıznestiń jańa túrin bastap, qolda baryn keńeıtýge múmkindik beredi. Eń bastysy kásipkerler áriptesteri óndirip jatqan ónimdermen jaqyn tanysa alady», - deıdi Aqmola oblysy kásipkerler palatasynyń dırektory Tımýr Nahıpbekov.
Eske sala keteıik, elimizde jyl saıyn QR Prezıdentiniń «Altyn sapa» syılyǵy baıqaýy men «Qazaqstannyń úzdik taýary» respýblıkalyq kórme-baıqaýy uıymdastyrylyp keledi. Oǵan aqmolalyq taýar óndirýshilerde qatysyp, úzdikter qatarynan kórinýde.
