Aqmola oblysynda tumaýǵa qarsy vaktsına egý jumystary bastalady

KÓKShETAÝ. QazAqparat – Aqmola oblysynda qyrkúıektiń 15-nen tumaýǵa qarsy ekpe egý jumystary bastalady. Osy rette ekpeni tegin alatyn adamdardyń toby anyqtalyp otyr. Bul týraly óńirlik kommýnıkatsııalar qyzmetinde ótken brıfıngte oblystyq taýarlar men qyzmetterdiń sapasy men qaýipsizdigin baqylaý departamentiniń basshysy Aınagúl Mýsına aıtty, dep habarlaıdy QazAqparat tilshisi.

Departament basshysynyń aıtýynsha, tumaýǵa qarsy ekpe alý úshin turǵyndar turǵylyqty jeri boıynsha tirkelgen emhanasyna barýy tıis.

«Oblys aýmaǵynda ekpe egetin 293 em-shara kabıneti anyqtalyp otyr. «Qaýipti» toptaǵy tulǵalarǵa ekpe egý úshin tegin 82 048 vaktsına qarastyrylǵan. Osy baǵytta jergilikti bıýdjet esebinen 13 mıllıon 962 myń teńgege 16,1 myń reseılik «Grıppol plıýs» vaktsınasy satyp alyndy. Bul vaktsına bıylǵy epıdemologııalyq maýsymda baıqalady dep boljanyp otyrǵan tumaýdyń A jáne V túrlerine qarsy egilmekshi», - dep atap ótti Aınagúl Mýsına.

Oblystyń bas sanıtar dárigeri atap ótkendeı, tumaýǵa qarsy tegin ekpeni medıtsına qyzmetkerleri, 2-3 aılyq júkti áıelder, sozylmaly aýrýymen dıspanserlik esepte turǵan eresekter men balalar, jıi aýyratyn 6 aıdan asqan balalar, jabyq mekemelerdegi adamdar alady.