Aqmola oblysynda tuqym sebý jumystary aıaqtaldy
KÓKShETAÝ. QazAqparat – Aqmola oblysynda tuqym sebý jumystary aıaqtaldy, dep habarlaıdy QazAqparat tilshisi oblystyq ishki saıasat basqarmasyna silteme jasap.
Oblystyq aýyl sharýashylyǵy basqarmasynyń málimetinshe, egistik alqaptyń basym kópshiligine, ıaǵnı 4,4 mıllıon gektaryna dándi jáne dándi burshaq daqyldary sebildi. Jalpy, oblys boıynsha jazǵy egis kólemi 4,9 mıllıon gektardy quraıdy. Tótenshe jaǵdaı baılanysty týyndaǵan qıyndyqtarǵa qaramastan oblystyń aýyl sharýashylyǵy taýarlaryn óndirýshiler aldyn ala belgilengen kestege saı naýqandy aıaqtady. Endigi ýaqytta, egindi baptap, zııankesterden qorǵaý, mal zyǵyn daıyndaý sııaqty jumystar kútip tur.
Basqarma basshysy Dımash Talaspaevtyń aıtýynsha, oblysta kóktemgi dala jumystaryn júrgizý úshin tómendetilgen baǵamen 68 myń tonna janar-jaǵar maı bólindi.
«Aıta ketý kerek, memlekettik qoldaýdyń arqasynda sońǵy jyldary aýyl sharýashylyǵy daqyldarynyń gektarǵa shaqqandaǵy túsimi artqandyǵy baıqalady», - dep atap ótti Dımash Talasbaev.
Onyń sózinshe, tuqym sebý naýqanyna 14 myńnan astam traktor, 16 myń tuqym seıalka jáne 1,2 myńnan astam ónimdiligi joǵary tuqym sebý kesheni tartyldy. Bıylǵy jylǵy tuqym qory 527 myń tonnany qurady.
